Kryeinspektori i Ministrisë së Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike, Lulzim Syla, ka thënë se do të ketë ndëshkime të ashpra për bizneset nëse konstatohet se ato kanë ngritur çmimet, pas situatës së fundit të shkaktuar nga koronavirusi.

Përmes një njoftimi të MEPTINIS-it, Syla ka thënë se pas shumë ankesave nga konsumatorët Inspektorati i Tregut ka dalë në terren për të zbatuar planin e jashtëzakonshëm. Bazuar në këtë plan, inspektorët do të monitorojnë tregun edhe jashtë orarit të punës, për të mbikëqyrur çmimet nëpër markete, me theks të veçantë produktet ushqimore e higjienike, bën të ditur komunikata.

“Gjatë ditës së sotme kam komunikuar zyrtarisht me të gjithë drejtorët e inspektorateve komunale që së bashku të bëjmë renditjen dhe të zhvillojmë aksionin e zbatimit të urdhëresës së ministres. Inspektorati do t’i kontrollojë dhe monitoroj të gjitha bizneset të cilët shesin produkte ushqimore dhe higjienike, dhe në rast se konstatohet se ka ngritje të çmimeve do të ketë masa të ashpra ndëshkuese”, ka thënë Syla, sipas njoftimit.

“Kërkoj nga ana e bizneseve që të mos ngritin çmimet e produkteve dhe mos ta shfrytëzojnë virusin Korona për përfitime materiale”, ka shtuar ai Syla.