Arbëri

Molliqaj: Për të ardhur në pushtet, Kurti dhe VV-ja e zhveshën vetën, për ta ruajtur pushtetin po zhveshin Kosovën

Kreu i PSD-së, Dardan Molliqaj përmes një postimi në Facebook ka thënë se Albin Kurti dhe Vetëvendosje për të ardhur në pushtet, e zhveshi veten dhe partinë, dhe për ta ruajtur pushtetin po e zhveshin edhe Kosovën.

“Për të ardhur në pushtet, Kurti dhe VV-ja e zhveshën vetën nga çdo parim e projekt politik. Hoqën dorë nga çdo kauzë mbi të cilën u ndërtuan e nga çdo premtim madhor që e kishin bërë. Por s’mjaftoi ardhja në pushtet. Tash Kurti do që ta mbajë pushtetin me çdo kusht. E për ta mbajtur pushtetin, ka filluar ta zhveshë Kosovën nga çfarëdo pozicioni i drejtë e i volitshëm negociues”, ka shkruar Molliqaj.

Kurti: Më 15 mars heqim taksën pjesërisht – Serbia ka afat 90 ditë për të reflektuar

Sipas Molliqajt, Kurti po e heq taksën për të ruajtur karrigen e kryeministrit.

“Kurti po e heq taksën ndaj Serbisë, jo sepse ka projekt të vetin përmes të cilit do ta zgjidhë problemin në mes Kosovës e Serbisë. Sepse nga projektet e tij tashmë është zhveshur. Kurti po e heqë taksën veç për shkak të presionit që po i bëhet karriges së tij të Kryeministrit”, ka shkruar ai.

Sipas tij Kurti i është nënshtruar Serbisë.

“Kurti po e heq taksën – kërkesë kjo që vjen nga Serbia – jo për të zbatuar një plan alternativ; jo për të vendosur reciprocitetin që e premtoi; as për të zhvilluar një dialog të ri, në baza të reja e me plan të ri. Kurti po e heq taksën sepse i është nënshtruar tërësisht projektit të vjetër negociues me Serbinë; sepse i është nënshtruar çfarëdo projekti që i ofrohet e që ia ruan pushtetin”, ka shkruar Molliqaj.

Molliqaj gjithashtu ka shkruar se luftën ndaj Thaçit, Kurti e ka pasur për t’ia zënë vendin.

“Sot po e shohim se si ai edhe luftën me Thaçin, nuk e kishte pasur kurrë si luftë kundër projektit të tij, por si luftë për të zënë vendin e tij – por që në fund përfundoi duke i shkuar prapa i zhytur tërësisht në projektin e Thaçit. Gjithçka qenka në pazar për Kurtin – ashtu siç ishte edhe për të tjerët para tij. E vetmja gjë e rëndësishme për të mbeti imazhi. Imazhi i një politikani gjoja ndryshe nga të tjerët. Prandaj krejt çka do të bëjë Kurti janë simbolikat që e ruajnë imazhin e tij, dhe kompromiset e dëmshme që ia ruajnë pushtetin”, ka shkruar Molliqaj.