Thaçi: Kosova e angazhuar për një marrëveshje finale të paqes me Serbinë
Foto nga presidenca
Presidenti i Republikës së Kosovës, Hashim Thaçi, ka takuar shefin ekzekutiv të ‘International Development Finance Corporation’, Adam Boehler, me të cilin ka biseduar për potencialet e Kosovës për të tërhequr investime të huaja.
Siç njofton kumtesa presidenciale, Thaçi ka thënë se Kosova është e përcaktuar kah e ardhmja, prandaj, citohet ai, “edhe po punon për ta mbyllur kapitullin e të kaluarës, duke u angazhuar për një marrëveshje finale të paqes me Serbinë”.
“Duke mbyllur kapitullin e luftës, ne bëjmë të mundur kthimin kah e ardhmja, kah zhvillimi ekonomik, kah investimet, kah prosperiteti”, u shpreh presidenti Thaçi.
Kreu i shtetit ka shtuar se Kosova është shtet i ri me potenciale të mëdha investimi, që presin të shfrytëzohen.
“International Development Finance Corporation (DFC) është agjenci e pavarur e Qeverisë Amerikane që ofron financim për projektet zhvillimore”, thuhet në njoftimin e presidencës.
