Kthimi i 110 kosovarëve nga vatrat e luftës në Siri, në prill të vitit të kaluar, vazhdon të jetë sfidë për Kosovën.
Qendra Kosovare për Studime të Sigurisë, në një tryezë diskutimi ka prezantuar raportin “Zbërthimi i përgjegjësisë së Kosovës ndaj të kthyerve nga zonat e luftës në Siri dhe Irak”.
Sipas raportit qeverisë i mungojnë politikat koherente dhe ka mangësi serioze me koordinimin dhe përfshirjen e shoqërisë civile në proces. Sipas raportit gjatë viteve 2012-2018, në zonat e luftës në Siri dhe Irak kanë shkuar rreth 403 kosovarë, ndërkohë që prej tyre vlerësohet se në Kosovës janë kthyer 242 persona.
“Është e domosdoshme që të vendoset një qasje koherente dhe e organizuar për të mbështetur rehabilitimin dhe riintegrimin e tyre”, thuhet në raport, transmeton Koha Ditore.
Teuta Avdimetaj nga QKSS tha se që nga viti 2012, në Siri dhe Irak janë bashkangjitur mbi 400 persona nga Kosova, ku shumë fëmijë edhe kanë lindur në këto zona.
Skënder Perteshi hulumtues në QKSS tha se në krahasim me vitin 2013, që synim ka qenë luftimi i radikalizmit, së fundmi është riintegrimi i këtyre personave, që po bëhen pjesë e luftërave në Siri e Irak.
"Raporti jonë tregon që Kosova është një prej vendeve të rralla që ka marrë vendim për kthimin e qytetarëve, për dallim prej disa vendeve të Bashkimit Evropian, ku kthejnë vetëm fëmijët. Kjo sjell edhe një barrë shumë të madhe. Kosova ka ndërmarrë hapa për rehabilitimin e tyre, por qasja ka qenë ndryshe", tha ai, raporton kosovapress.
Perteshi tha se rikthimi i 110 qytetarëve në vitin e kaluar në Kosovë, ishte sfidë për institucionet e Kosovës.
"Nuk ka pasur qasje koherente në mes institucioneve. Shumica e dënimeve që janë marrë për luftëtarët kanë qenë të shkurtra. Nuk ka pasur masa përcjellëse në momentin që kur ai del prej burgut. Kur ata kanë dalë në komunitet nuk ka pasur masa konkrete për trajtimin e tyre", ka shtuar Perteshi.
Përkundër investimeve të mëdha ai tha se ka nevojë për trajtime specifike, në veçanti për Shërbimin Korrektues të Kosovës.
Sipas Perteshit, shumë pak po punohet në identifikimin e personave të radikalizuar dhe i takojnë kësaj ideologjie, e që në fakt nuk kanë marrë pjesë ende në këto luftëra.
© KOHA. Të gjitha të drejtat janë të rezervuara.
