2 perditesime
13:56

Veliu e lë të hapur mundësinë për marrëveshje me Vetëvendosjen, por e kushtëzon me postin e kryeparlamentarit

Nënkryetari i LDK-së, Agim Veliu pas mbledhjes së Kryesisë së kësaj partie, ka thënë se po presin që Vetëvendosje të deklarohet për ofertën e kësaj partie.

“Ne po presim nga Vetëvendosje të deklarohet për ofertën tonë për kryeparlamentarin dhe 5 ministri dhe zotimi për presidentin. Kjo është oferta që qëndron dhe presim përgjigje. Ky është qëndrim i organeve të LDK-së, ka thënë Veliu.

Ai ka lënë të hapur mundësinë që sot të arrihet marrëveshja me VV-në.

“Sipas mendimit tim sot duhet të ndodhë. Ne nuk heqim dorë nga kryeparlamentari”, ka insistuar Veliu.

13:01

LDK-ja s’lëshon pe nga pozita e kryeparlamentarit

Burime brenda LDK-së kanë konfirmuar për Koha.net se takimi mes kryetarit të kësaj partie, Isa Mustafa, dhe atij të Vetëvendosjes, Albin Kurti, do të mbahet pasdite. Po ashtu ky burim ka thënë se LDK-ja nuk do të lëshojë pe nga pozita e kryeparlamentarit.

“Po, takimi do të ndodhë sot pasdite. LDK-ja ka qëndrimin që nuk lëshon pe nga pozita e kryeparlamentarit”, ka thënë ky burim.

LDK-ja në ofertën e fundit publike i kërkoi VV-së ta lëshojë postin e kryeparlamentarit dhe kjo pozitë t’i takojë LDK-së deri në momentin e votimit të presidentit të ri. Pasi të marrë presidentin, LDK-ja ka thënë se do të kthente postin e kryeparlamentarit te VV-ja. Glauk Konjufca i VV-së është kryeparlamentar që nga 26 dhjetori. Ai u votua edhe nga deputetë të LDK-së në seancën konstituive, edhe pse partitë kishin shkuar pa marrëveshje paraprake.

12:48

Mustafa konfirmon se sot takohet me Kurtin, beson në marrëveshje

Kryetari i Lëvizjes Vetëvendosje, Albin Kurti, dhe ai i LDK-së, Isa Mustafa, do të takohen sot, në vazhdën e negociatave për formimin e koalicionit qeverisës.

Lajmi është konfirmuar nga i pari i LDK-së që, para selisë së partisë, ka thënë para gazetarëve se beson se marrëveshja mund të arrihet. Ai nuk ka specifikuar kohë të takimit.

Dy liderët do të takohen pas një kohe të gjatë të komunikimit në distancë me njëri-tjetrin.

E diela ishte dita e fundit e afatit që Mustafa i kishte dhënë Kurtit për pranimin e një oferte të LDK-së për bashkëqeverisje.

Sipas burimeve të gazetës Koha Ditore, në mes të partive ka pasur një përafrim qëndrimesh për arritjen e koalicionit.