Krasniqi e quan mendësi shkatërruese ndarjen e MKRS-së nga VV-ja e LDK-ja Foto: Ilustrim

Krasniqi e quan mendësi shkatërruese ndarjen e MKRS-së nga VV-ja e LDK-ja

14 January 2020 21:36

Ish-ministri i Kulturës, Rinisë dhe Sportit, Memli Krasniqi, e ka quajtur qëllimkeqe idenë e Vetëvendosjes dhe LDK-së që të ndajnë këtë ministri.

Sipas tij, “copëtimi i MKRS-së me stil kasapi është prodhim i mendësisë shkatërruese”.

Në negociatat mes VV-së e LDK-së për formimin e qeverisë është thënë se kjo ministri do të ndahet e Kultura dhe Rinia do t’i bashkohen asaj të Arsimit, ndërsa ajo e Sportit do t’i bashkohet Shëndetësisë. Sipas Krasniqit, ky propozim është qëllimkeq dhe tregon mendësi mashtruese.

“Propozimi për shuarjen e Ministrisë së Kulturës, Rinisë dhe Sportit (MKRS) është jo vetëm i pamenduar mirë, por esencialisht qëllimkeq. Nëse vërtet MKRS copëtohet me këtë stil kasapi, për ta shpërndarë atë nëpër ministri të tjera, vetëm sa për të thënë se po zvogëlohet numri i ministrive, kjo tregon më së miri mendësinë mashtruese të atyre që e kanë propozuar dhe miratuar këtë ide. Dikasteret e Kulturës, Rinisë, Sportit, Trashëgimisë Kulturore dhe Të Drejtës Autoriale, edhe duke u mbuluar nga një ministri e veçantë, kanë pasur vazhdimisht nevojë për më shumë mbështetje dhe vëmendje nga qeveria. Ne mandatin e fundit, të gjitha këto fusha kanë shënuar përparim dhe suksese. Ndërsa, nëse në mandatin e ardhshëm ato ndahen dhe hidhen një atje, e një diku tjetër, ky do të jetë zhvillimi më negativ që mund të ndodhë për këto fusha, e mbi të gjitha për komunitetet që i përfaqësojnë ato”, ka shkruar ai në Facebook.

Krasniqi ka thënë tutje se askush s’e ka bërë Kosovën më shumë krenare se sukseset e sportistëve dhe artistëve.

“Në vend se këto suksese të bëhen shkas për t’i mbështetur ata edhe më shumë në mandatin e ri, kjo tentim-qeveri edhe zyrtarisht po dëshiron që t’i margjinalizojë këto komunitete, duke i degdisur ato nëpër ministri të cilat kurrë nuk do të merren seriozisht me nevojat dhe kërkesat e tyre. Sepse, Arsimi e Shëndetësia janë fusha të cilat doemos do ta dominojnë jo vetëm interesimin e atyre që do t’i udhëheqin ato ministri, por edhe identifikimin e tyre dhe vlerësimin se sa të (pa)suksesshëm do të dalin në krye të atyre ministrive”, ka thënë tutje ai.

Krasniqi ka thënë se nëse kjo ide do të realizohet, “do të pezullohet një pjesë e madhe e legjislacionit aktual që e zbaton MKRS, e veçanërisht Ligji për Sponsorizime, të cilin, me shumë vështirësi e kundërshtime nga këta që sot po tentojnë ta bëjnë qeverinë e re, e miratuam në mandatin e kaluar”.

“Zhbërja e MKRS-së do ta pamundësojë zbatimin e këtij ligji, duke ua pamundësuar sportistëve, artistëve, të rinjve, klubeve sportive e institucioneve kulturore që të marrin mbështetje financiare nga sektori privat, për çka kanë shumë nevojë dhe kanë punuar e kërkuar me vite të tëra”, ka shtuar Krasniqi.

Ai ka thënë se një ide për “copëtimin” e MKRS-së është fyerje.

“Për kulturën, rininë e sportin, së paku paskan diskutuar mbrapsht, por për trashëgiminë kulturore e për të drejtën autoriale as edhe një fjale e vetme. Thua se këto fusha janë aq të parëndësishme, saqë duhet zhdukur tërësisht edhe departamentet ekzistuese në MKRS. Kjo është jo vetëm e dhimbshme, por mbi të gjitha fyese dhe ofenduese. Veçanërisht për ata qindra profesionistë të trashëgimisë kulturore që punojnë në dhjetë institucione vartëse të MKRS-së, për fatin e të cilave tashmë nuk dihet asgjë. Kjo vlen edhe për të gjithë profesionistët e institucioneve të kulturës që janë në kuadër të MKRS-së”, ka thënë tutje ai.

“Nuk ma ka marrë mendja se kushdo që pretendon të qeverisë me vendin, do të mund t’i zhbënte me kaq lehtësi këto dikastere kaq të rëndësishme, bile identitare dhe të pazëvendësueshme për një shtet të ri e të brishtë si Kosova. Por, tashmë shihet qartë se mendësia shkatërruese që i ka dalluar në opozitë për vite të tëra, duket se do të jetë mënyra e veprimit të tyre edhe në qeveri, nëse veç arrijnë ta bëjnë atë”, ka përfunduar reagimin e tij Krasniqi.

© KOHA. Të gjitha të drejtat janë të rezervuara.

Komentet

Shto koment

Të ngjashme