Komandanti i ri i MSU-së të karabinierëve italianë i gatshëm të ndihmojë sistemin prokurorial në Kosovë

Komandanti i ri i MSU-së të karabinierëve italianë i gatshëm të ndihmojë sistemin prokurorial në Kosovë

09 December 2019 12:22

Kryeprokurori i Shtetit, Aleksandër Lumezi, ka pritur sot komandantin e ri të Njësisë Multinacionale të Specializuar (MSU) të karabinierëve italianë, në kuadër të misionit të KFOR-it në Kosovë, kolonelin Paolo Pelosi, bëhet e ditur përmes një njoftimi për media.

Kryeprokurori Lumezi fillimisht i ka uruar mirëseardhje dhe suksese në misionin e ri kolonelit Pelosi, ndërsa në vazhdim e ka njoftuar atë me punën dhe të arriturat e Prokurorit të Shtetit në funksion të forcimit të sundimit të ligjit.

Në anën tjetër, koloneli Paolo Pelosi, duke e vlerësuar punën e Prokurorit të Shtetit, ka shprehur gatishmërinë e tij për të ndihmuar sistemin prokurorial në të gjitha çështjet që karabinierët në kuadër të misionit të KFOR-it mund të kontribuojnë.

Po ashtu, kryeprokurori Lumezi dhe koloneli Pelosi biseduan edhe për gjendjen e sigurisë në Kosovë, me ç‘rast vlerësuan bashkëpunimin e deritanishëm, si dhe u pajtuan që ky bashkëpunimin ndërmjet institucionit të Prokurorit të Shtetit dhe Njësisë Multinacionale të Specializuar të Karabinierëve Italianë në kuadër të misionit të KFOR-it, të avancohet edhe në të ardhmen.

Në fund të takimit, kryeprokurori i Shtetit, Aleksandër Lumezi, ka falënderuar kolonelin, Paolo Pelosi, për kontributin dhe angazhimin e karabinierëve dhe KFOR-it, për të mbështetur paqen, sigurinë dhe stabilitetin në Kosovë, thekson njoftimi.

© KOHA. Të gjitha të drejtat janë të rezervuara.

Komentet

Shto koment

Të ngjashme