Hoti: Nëse VV-së i duket shumë kërkesa jonë, le të ndërrohemi

05 December 2019 23:25
23:39

Anëtari i LDK-së Avdullah Hoti ka thënë se posti i presidentit është pjesë e marrëveshjes, duke shtuar se ka qenë në pjesën e ndarjes së përgjegjësive dhe iu është lënë liderëve që ta diskutojnë.

Hoti thotë se një çështje e tillë nuk është diskutuar në grupet punuese por ka hyrë në pjesën e marrëveshjes.

“Te pjesa e ndarjes së përgjegjësive ka qenë e liderëve politik. Ende jemi brenda afatit kushtetues, presidenti ende nuk e ka ftuar seancën dhe jemi ende në kohë. Edhe pse duhet të ketë një besim më reciprok në mes të partnerëve dhe kujdes më të madh sepse kur qeverisim së bashku ne do të ballafaqohemi me situata të ndryshme”, ka thënë ai në Interaktiv të KTV-së.

Ai ka thënë se nëse Vetëvendosjes i duket që ata po kërkojnë shumë atëherë mund të ndërrohen me LDK-në, në mënyrë që ata ta marrin pozitën e presidentit, kryeparlamentarit dhe pesë ministri, ndërkaq LDK të marrë kryeministrin dhe pesë ministri.

Hoti tutje nuk ka dashur të komentojë nëse pozita e presidentit është pika e ndarjes me Vetëvendosjen por shton se duan përgjegjësi të barabarta.

“Kryeministri është pozita kryesore në vend për nga fuqia ekzekutive. Është praktikë tash e 20 vjet në Kosovë që njëri e ka kryeministrin e tjetri e ka presidentin. Besoj që kjo është një marrëveshje fer. Njëri nga nënkryetarët tanë para disa ditëve tha se nëse besojnë që ka më shumë përgjegjësi njëra munden të ndërrohen”, ka thënë ai.

Ai shton se qytetarët që kanë votuar për deputetët duan që ata t’i zgjedhin edhe krerët e institucioneve të vendit.

Hoti thotë se ata pozita e kryeministrit është e pa negociueshme vetëm kur i fiton mbi 61 për qind të votave, duke shtuar se ata janë pajtuar që pozita e kryeministrit të jetë e Lëvizjes Vetëvendosje.

Sipas tij, qytetarët nuk i kanë dhënë besimin vetëm Vetëvendosjes apo vetëm LDK-së për të qeverisur.

Ai ka përsëritur se posti i presidentit është pjesë e marrëveshjes.

“Do të formohet edhe qeveria por edhe do të dakordohemi për pjesën se si do të zgjidhet presidenti”, ka thënë ai.


Hoti thotë se presin nga VV-ja ta thirrin takimin e radhës

Anëtari i LDK-së, Avdullah Hoti ka thënë se nuk është arritur ende asnjë pajtim për ndarje të ministrive.

Sipas tij nëse nuk arrihet marrëveshje për të gjitha çështjet, nuk ka marrëveshje vetëm për çështje të caktuara.

Hoti thotë se ende nuk ka takim të caktuar mes Kurtit e Mustafës, derisa shton se ju takon Vetëvendosjes për ta thirrur takimin e radhës.

Ai ka kërkuar edhe njëherë nga anëtarët e Vetëvendosjes që të jenë të përmbajtur, duke shtuar se çështjet e brendshme duhet të mbesin të tilla pasi ende nuk ka diçka zyrtare.

Ai thotë se posa të arrihet marrëveshja gjithçka do të bëhet publike. Sipas tij kjo nuk është ngecje, por është vazhdim i negociatave.

“Deklarimet e disa zyrtarëve të Vetëvendosjes kanë qenë të pavenda sepse nuk i bëhen kualifikime të tilla LDK-së pasi jemi partia më korrekte në vend”, ka thënë ai.

Ai i ka quajtur të pavenda dhe të papranueshme deklaratat e nënkryetarit të VV-së Glauk Konjufca.

Hoti thotë se Vetëvendosjes si fituese i takon iniciativa dhe përgjegjësia për të fituar shumicën në Kuvend.

Ai thotë se janë të interesuar për një qeveri e cila e mban një mandat të plotë.

Sipas tij nëse nuk arrijnë marrëveshje me VV-në vendi i LDK-së është në opozitë.

“Qasja jonë ka qenë komplet korrekte, nuk është që e kemi shfrytëzuar situatën aspak”, thotë ai.

“Propozimi i kandidatit për president të vendit vjen nga LDK, sikur po themi që propozimi i kandidatit për kryeministër pasi VV nuk e ka fituar kryeministrin”, thekson Hoti.

23:25

Hoti thotë se duan përgjegjësi të barabarta me Vetëvendosjen në qeverisje

Anëtari i kryesisë së LDK-së, Avdullah Hoti ka thënë me Vetëvendosjen kanë përafruar pothuajse plotësisht programet e tyre qeverisëse, në të gjitha fushat pa përjashtim.

Ai në Interaktiv të KTV-së ka thënë se kanë arritur t’i dizajnojnë se si do të duken institucionet, sa e madhe do të jetë qeveria, duke shtuar se kanë bërë gjithë strukturën e institucioneve.

Hoti thotë se duke pasur parasysh që rezultati zgjedhor është i përafërt me atë të Vetëvendosjes, LDK-ja ka kërkuar që përgjegjësitë që marrin brenda institucioneve të jenë të balancuara.

“Kanë ndodhur dy takime deri më tash mes liderëve të partive për të arritur një marrëveshje për të qeverisur, bisedat do të vazhdojnë, unë pres që të vazhdojnë më tutje”, ka thënë ai.

Ai thotë se në takimin e fundit LDK-ja kishte shkuar me vullnetin për të arritur marrëveshjen, por sipas tij, jo gjithmonë gjërat mbyllen me një takim.

Ai tutje iu ka bërë thirrje zyrtarëve të Vetëvendosjes që të përmbahen nga deklaratat dhe kualifikimet të cilat mund t’i lëndojnë raportet mes dy subjekteve.

“Unë besoj që ditët e ardhshme, në takimet e ardhshme mund të përafrohen gjërat. Ajo që është e rëndësishme gjatë këtyre ditëve është që të gjithë zyrtarët e Lëvizjes Vetëvendosje të përmbahen nga çfarëdo kualifikimi që mund t’i japin, krejt të panevojshëm, që vetëm sa mund të lëndojë raportet në mes të dy subjekteve”, ka thënë ai.

Hoti thotë se ajo çka i shtynë që ta shohin mundësinë e bashkëpunimit është e mira e qytetarëve dhe dakordimi i programit mes dy partive.

“Qëndrimi i jonë nga fillimi ka qenë i njëjtë, që partnerët duhet ta respektojnë njëri tjetrin në kuptimin e përgjegjësive që marrin brenda institucioneve në mënyrë që detyrimet të jenë të balancuara. Fuqinë politike dhe përgjegjësinë që merr LDK-ja të jenë të ngjashme me ato të VV-së sepse rezultati është i tillë. Këto dy subjekte mund ta formojnë qeverinë vetëm nëse janë së bashku. Nuk mundet VV të bëjë qeverinë pa LDK-në. Ne po mundohemi t’i bindim VV-në se e mira e qytetarëve është një qeveri stabile që mund të arrihet mes një marrëveshje korrekte mes dy partnerëve të koalicionit, duke i definuar të gjitha çështjet.

Në marrëveshje të përfshihen të gjitha çështjet që vijnë në qeveri gjatë katër vjetëve të ardhshme”, ka thënë ai.

© KOHA. Të gjitha të drejtat janë të rezervuara.

Komentet

Beni11/12/2019 13:16

Qe 20 vjet LDK`ja ne Qeveri, dhe qe 20 Vjet shkatrim, shkatrim, shkatrim......nuk i kuptoj ata qe votojn per LDK, ju shkoj jeta ne shkarim, dhe ende doni me jetu ne ket shkatrim dhe nuk doni me ndru asgje....tmer ky popull, sa mrapambetur jemi !

Shto koment

Të ngjashme