21:42

Vuçiq: Të ishte për Putinin, nuk do të bombardoheshim në vitin 1999

Presidenti serb Aleksandar Vuçiq, tha të martën në Soçi të Rusisë se po të ishte në vitin 1999 në krye të federatës ruse Vlladimir Putin, nuk do të ndodhte bombardimi i Serbisë nga NATO-ja.

Ai i bëri këto komente pas takimit me presidentin rus të cilit i tha se nuk “është optimist” për gjetjen e një zgjidhjeje për Kosovën, pavarësinë e së cilës Beogradi vazhdon ta kundërshtojë dhe për këtë ka edhe mbështetjen e Moskës, raporton VOA.

Presidenti serb tha se Serbia pret pajisjen e ushtrisë së saj me armatime të tjera ruse ndërsa theksoi se “po të vendoste Putini në Rusi në vitin 1999, Serbia nuk do të bombardohej...”.

Bombardimet e NATO-s në vitin 1999 u dhanë fund mizorive të forcave serbe në Kosovë, e cila në shkurt të vitit 2008 shpalli pavarësinë e saj me mbështetjen e Shteteve të Bashkuara dhe vendeve kryesore të Bashkimit Evropian.

Serbia mbetet aleate e Rusisë, ndonëse synon anëtarësimin në Bashkimin Evropian ndërsa shumica e serbëve e shohin Rusinë si mbrojtëse të tyre edhe për shkak të qëndrimit të saj kundër pavarësisë së Kosovës.

Takimi i së martës pasoi zbulimin e një skandali të spiunazhit muajin e kaluar ku ishin përfshirë agjentë rusë dhe pjesëtarë të ushtrisë serbe.

Ndonëse kishte pohuar se janë dokumentuar operacionet e tilla të spiunazhit, presidenti serb kishte thënë se kjo nuk do të dëmtojë marrëdhëniet “vëllazërore” të Serbisë me Rusinë dhe kishte ritheksuar zotimin se vendi i tij nuk do të mbështesë asnjë veprim kundër Moskës, njësoj siç ka kundërshtuar të mbështesë sanksionet ndërkombëtare ndaj saj për shkak të ndërhyrjes në Ukrainë.

18:05

Putini insiston se zgjidhja Kosovë-Serbi duhet të vijë përmes Rezolutës 1244

Rusia është e gatshme të mbështesë zgjidhjen e mundshme të kompromisit të, siç tha presidenti rus, Vlladimir Putin, “problemit të Kosovës” nëse ajo arrihet mes Beogradit e Prishtinës.

Megjithatë, siç tha Vuçiqi, i cili po qëndron në një vizitë zyrtare në Rusi, pritjet për arritjen e kompromisit “nuk janë të mëdha”, raporton Kossev.

“Ia kam përcjell presidentit Putin pritjet e mia jo të mëdha për sa i përket bisedimeve me palën shqiptare në të ardhmen, e mbi të gjitha duke pas parasysh deklarimet e tyre, por edhe tentimet që me presione të arrijnë vetëm njohjen e pavarësisë, ndërsa Serbia të mos fitojë asgjë. Kjo s’është e mundshme, nuk është realiste, kjo s’do të ndodhë”, tha presidenti serb Vuçiq, nga qyteti olimpik rus, Soçi, transmeton Koha.net.

Ai ka falënderuar Federatën Ruse për mbështetjen që i ka dhënë për integritetin territorial dhe interesat politike të Serbisë, veçanërisht kur janë në pyetje Kombet e Bashkuara, dhe ka premtuar mbështetje të njëjtë edhe nga pala serbe.

Ngjashëm për çështjen e Kosovës u deklaruar edhe presidenti rus Putin, duke përsëritur se qëndrimi rus është ai i njëjti se zgjidhja duhet të vijë përmes Rezolutës 1244.

“Qëndrimi ynë është i pandryshuar. Baza për zgjidhjen duhet të jetë Rezoluta 1244 e KS të OKB-së në të cilën janë të paraqitura parimet themelore të zgjidhjes paqësore të krizës së Kosovës, të respektimit të tërësisë territoriale të Serbisë, mbrojtje adekuate për të gjitha grupet etnike që jetojnë në rajon”, tha Putini në konferencën e përbashkët me Vuçiqin.

Megjithatë, Putini thotë se Rusia është e gatshme të mbështesë pozicionin e Beogradit.

“Rusia është e gatshme të mbështesë zgjidhjen e mundshme të kompromisit të problemit të Kosovës nëse kjo arrihet mes Beogradit dhe Prishtinës. Natyrisht, ne do të mbështesim pozicionin e Beogradit”, tha Putini.

13:20

Vuçiq me Putinin në Soçi, nuk tregon optimizëm për një marrëveshje kompromisi me Kosovën

Presidenti i Serbisë, Aleksandar Vuçiq ndodhet për një vizitë në Soçi në Rusi.

Ai, siç raportojnë mediat, pos çështjeve me rëndësi bilaterale për të dy vendet, që në fillim të bisedimeve me presidenti rus, Vladimir Putinin, ka prekur çështjen e Kosovës, transmeton Koha.net.

“Nuk jam optimist kur është fjala për arritjen e marrëveshjes përfundimtare kompromise në mes të Beogradit e Prishtinës”, citohet të ketë thënë Vuçiqi.