3 perditesime
21:12

Nurellari thotë se në fillim dialogu i solli Kosovës një valë njohjesh

Sipas Adri Nurellarit, dialogu me Serbinë, në fillim i solli Kosovës një valë të njohjeve, por dëm i bëri debati i dy vjetëve të fundit.

“Në fazën e parë meqenëse Kosova u duk si faktor stabiliteti që do ta zgjidhë të kaluarën nëpërmjet mirëkuptimit ka pasur një valë të mirëfilltë të njohjeve që kanë ardhur me atë motiv”, ka thënë Nurellari në Rubikon të KTV-së. “E keqja që ndodhi është debati i dy viteve të fundit”.

“Dialogu në vetvete, s’po flas për propozimet që erdhën dhe debatin që e shoqëroi atë, sepse këtu duhet të bëhet një diferencë e madhe, mes dialogut dhe propozimeve. Dialogu ka qenë shumë kontribuues”, ka thënë ai.

Sipas Nurellarit, propozimet dhe debati që e përcolli e demonizuan dialogun.

21:04

Emini: BE-ja më shumë u fokusua në stabilitet në Ballkan, sesa në reforma

Image

Donika Emini, drejtoreshë në CiviKos, ka thënë se Bashkimi Evropian në vitet e fundit ka vendosur për stabilitet dhe jo reforma.

“Nuk ka pasur reforma, ka pas stabilitet, është vendosur bashkëpunimi me autokratë dhe nuk ke pasur shanse në Bruksel ta kritikosh një lider ballkanik sepse ata kanë thënë që Vuçiqi është i keq, por së paku po bashkëpunon me neve. Kush tjetër përveç Vuciqit, të tjerët janë më të këqij, pra nuk janë eksploruar shumë opsionet tjera”, ka thënë Emini.

“Duhet të ketë kujdes me valën pozitive sepse kur u nënshkrua marrëveshja Maqedoni-Greqi pati pritje që gjithçka do të ecën mirë, por që s’duket se doli ashtu”

Ajo përmendi çështjen e taksës dhe raportin e BE-së ndaj saj, duke e cilësuar si hipokrizi fokusin e tyre ndaj Serbisë dhe duke e injoruar Bosnjën.

"Është hipokrizi prej BE-së që kur reagojnë për tarifë nuk reagojnë për Bosnjë por për Serbinë dhe këtu tregojnë sa selektivë janë ata dhe kënd e kanë ata prioritet”, ka thënë ajo.

20:47

Vasolli: Kosova të reflektojë për kriteret e BE-së

Image

Besnik Vasolli, njohës i integrimeve evropiane në Rubikon të KTV-së ka thënë se Kosova dhe rajoni nuk duhet të dekurajohen nga vendimet aktuale të BE-së.

Sipas tij, duhet të reflektohet që fillimisht çdo zbatim i kriterit shkon në të mirë dhe zhvillim të vendit dhe pastaj të Gjermanisë e Francës.

“Ne si Kosovë dhe rajon duhet të reflektojmë. Gjatë viteve të kaluara, por edhe tash jemi duke e lënë një përshtypje që zbatimi i këtyre kritereve që kërkohen janë në interes të Francës dhe të Gjermanisë para se te jenë në interes tonin dhe rajonit”, ka thënë ai. “Nëse flasim për luftimin e korrupsionit, reformat e administratës, ne përfitojmë së pari”.

“Integrimi në BE ishte një lloj stimuluesi për të gjitha vendet, por duhet të reflektojmë e të shohim brenda vetes. Ne duhet të vazhdojmë t’i zbatojmë këto kritere pa marrë parasysh në çfarë momenti ndodhemi tash. Pres që t’i shfrytëzojmë shumë mençur dy presidencat e ardhshme, njëra është Kroacia dhe pas tyre e marrin gjermanët. E kemi edhe procesin e Berlinit i cili ka ndihmuar në bashkëpunim më të mirë rajonal. Së pari të vazhdojmë brenda e të mos dekurajohemi dhe të punojmë pak më shumë edhe në aspektin rajonal”, ka thënë tutje ai.

20:25

Muja nuk pret që të ketë zgjerim të BE-së edhe për dhjetë vjet

Image

Opinionisti Armend Muja në Rubikon të KTV-së ka thënë se nuk pret që të ketë zgjerim të Bashkimit Evropian të paktën edhe për 10 vjetët e ardhshme.

“Ajo çka e dimë ne tash është se të paktën deri në vitin 2025 nuk do të ketë hapa premtues, pastaj nëse merret edhe ratifikimi e kështu me radhë, do të thotë brenda 10 vjetëve nuk e ki zgjerimin e parë që ndodh në Ballkan”, ka thënë Muja.

“Ne në Kosovë i njohim katër BE. Një për vizat, një për MSA-në, një për dialogun dhe një si stimulator për bashkëpunimin rajonal", ka thënë ai.

Mirëpo, sipas Mujës, nga asnjë prej këtyre Kosova nuk është që ka pasur ndonjë benefit.

“Sa i përket MSA-së, Kosova i ka rezistuar reformave të brendshme, sidomos në dy vjetët e fundit pasi ka pasur një qeverisje të çoroditur”, ka shtuar ai.