14:44

Tre zyrtarëve policorë të arrestuar në veri u caktohet masa e ndalimit për 48 orë

Inspektorati Policor përmes një komunikate për media bën të ditur se tre zyrtarëve policorë të arrestuar në veri u është caktuar masa e ndalimit për 48 orë.

Tutje thuhet se hetuesit e Departamentit të Hetimeve të IPK-së kanë përfunduar intervistat me të dyshuarit e arrestuar sot në orët e hershme të mëngjesit në Mitrovicën e Veriut me dyshimin se të njëjtit kanë kryer veprat penale “Krim i organizuar” dhe “Keqpërdorim i pozitës zyrtare”.

“Zyrtarëve të arrestuar (togerit policor me inicialet Z.R, rreshterit policor N. G dhe zyrtarit policor L.V) me vendim të prokurorit kompetent u është caktuar masa e ndalimit për 48 orë”, thuhet në komunikatë.

12:49

Avokati i togerit të arrestuar në veri, thotë se ai do të mbrohet në heshtje

Policia e Kosovës sot arrestoi tre zyrtarë policorë nën dyshimin për veprat penale “Krim i organizuar” dhe “Keqpërdorim i pozitës zyrtare”.

Në mesin e tyre është edhe togeri Zoran Radonoviqit nga Zubin Potoku.

Avokati i tij, Nasuf Hasani ka folur pas përfundimit të intervistimit, raporton KTV.

Ai ka thënë se klienti i tij akuzohet për keqpërdorim të detyrës zyrtare, mito dhe krim të organizuar. Sipas tij nuk janë paraqitur prova të mjaftueshme kundër togerit.

“Në këtë fazë i mbrojturi im ka vendos me u mbrojt në heshtje. IPK nuk ka paraqitur asnjë provë. Është absurde ose është bërë spektakël. Është dashtë me një telefonatë të ftohet pasi është polic. Nuk ka prova. Prokurori pritet me bë kërkesën për paraburgim”, tha ai.

Image
10:22

IPK-ja jep detaje për aksionin në veri, tre zyrtarë policorë të arrestuar

Në veri të Mitrovicës janë arestuar një toger policor, një rreshter dhe një zyrtar policor. Ky arrestim u bë nga IPK-ja me urdhëresë të Prokurorisë Speciale nën dyshimin për veprat penale “Krim i organizuar” dhe “Keqpërdorim i pozitës zyrtare”.

Inspektorati Policor i Kosovës respektivisht hetuesit e Departamentit të Hetimeve në bashkëpunim me Policinë e Kosovës, përmes një sqarimi për media thonë se mëngjesin e sotëm kanë arrestuar tre zyrtarë policorë në Mitrovicën e Veriut.

“Operacioni i sotshëm që u zhvillua me urdhëresë të Prokurorisë Speciale të Republikës së Kosovës është vazhdimësi e operacionit të zhvilluar në muajin maj të këtij vitit të koduar me emrin “Kontrabanda”, thuhet tash në sqarimin e tyre.

Përmes njoftimit thonë se arrestimi i tre të dyshuarve, një toger policor, një rreshter dhe një zyrtar policor, është realizuar me urdhëresë të Prokurorisë Speciale me dyshimin se të njëjtit kanë kryer veprat penale “Krim i organizuar” dhe “Keqpërdorim i pozitës zyrtare”.

“Të arrestuarit do të intervistohen nga hetuesit e IPK-së në koordinim me prokurorin kompetent. Me tri arrestimet e sotshme, gjithsej numri i zyrtarëve policorë të arrestuar gjatë këtij operacioni ka shkuar në 25”, përfundon njoftimi.

09:21

Në veri të Mitrovicës po vazhdon aksioni policor

Në Mitrovicën Veriore është duke vazhduar aksioni policor që nisi javën e kaluar, për arrestimin e tre të dyshuarve të përfshirë në vrasjen e Oliver Ivanoviqit.

Ky aksion policor është konfirmuar për KTV-në nga Prokuroria Speciale e Kosovës.

“Ky aksion është duke u bërë me urdhër të Prokurorisë Speciale të Republikës së Kosovës, si dhe është vazhdim i aksionit te mëparshëm, për arrestimin e tre të dyshuarve për veprat penale “Krim të organizuar” dhe “Keqpërdorim te pozitës zyrtare”, ka thënë Ekrem Lutfiu, zëdhënës në Prokurorinë Speciale.

Kujtojmë se më 16 tetor, ditë e mërkurë, që nga orët e hershme të mëngjesit Policia e Kosovës nisi aksion policor në veri me ç’rast u arrestuan dy persona, e njëri është ende në kërkim, nën dyshimin për vrasjen e Oliver Ivanoviqit.

Rade Basara, është njëri prej policëve të arrestuar të cilit iu dha një muaj paraburgim, derisa, Zhelko Bojiq, është ende duke u kërkuar. Hetuesi i PK-së i arrestuar Rade Basara po hetohet nga PSRK për keqpërdorim të detyrës zyrtare që lidhet me hetimet dhe vrasjen e politikanit serb Oliver Ivanoviq. Pos kësaj, ai po hetohet edhe për “pjesëmarrje ose organizim i grupit kriminal”.

Kolegët e tij e kanë kërkuar në dy lokacione të ndryshme edhe Zhelko Bojiqin, shef i operativës se Policisë për komunat veriore, por nuk kanë arritur ta gjejnë atë. Në njërin lokacion, megjithatë, e kanë arrestuar djalin e tij, Vasilje Bojiq, sepse i janë gjetur armë dhe municion, por ai është liruar në procedurë të rregullt dhe do të hetohet vetëm për armëmbajtje pa leje.