Arbëri

Kosova anulon pjesëmarrjen në Samitin e Pragës

Foto: Koha

Kosova ka anuluar pjesëmarrjen e planifikuar në Samitin i Pragës, mes katër shteteve të Vishegradit dhe shteteve të Ballkanit Perëndimor, ka njoftuar Agjencia Çeke e Lajmeve, duke iu referuar burimeve të saj diplomatike.

Refuzimi i Kosovës për të marrë pjesë në takimin e së enjtes, vjen si kundërpërgjigje ndaj deklaratave të presidentit çek, Milosh Zeman, i cili, të enjten e kaluar, kishte deklaruar se dëshiron t’i diskutojë mundësitë kushtetuese që Republika Çeke të tërheqë njohjen e pavarësisë së Kosovës, raporton KTV-ja.

Lexo edhe: Ndërsa presidenti do të kërkojë tërheqjen e njohjes së Kosovës, kryetari i Senatit çek e quan punë koti

Burime të Agjencisë Çeke të Lajmeve thonë që momentalisht nuk ka mysafirë të konfirmuar nga Kosova për këtë takim në nivel kryeministrash.

Republika Çeke e ka njohur Kosovën më 21 maj 2008, por presidenti Milosh Zeman ka refuzuar të pranojë kredencialet duke mbajtur përfaqësimin diplomatik në nivel të të ngarkuarve në punë, e jo ambasadorëve.