Gjuriq i thërret serbët e Kosovës të tubohen rreth Listës Serbe dhe “të punojnë për Serbinë” Foto: Ilustrim

Gjuriq i thërret serbët e Kosovës të tubohen rreth Listës Serbe dhe “të punojnë për Serbinë”

29 August 2019 10:23

Beograd, 29 gusht - Serbët e Kosovës duhet të shfaqen bashkë dhe në unitet, të tubohen rreth Listës Serbe dhe të dalin në zgjedhjet e ardhshme të parakohshme parlamentare në Kosovë.

Kështu ka thënë Marko Gjuriq, drejtor i Zyrës për Kosovën në Qeverinë e Serbisë, raporton FoNet, transmeton Koha.net.

Ai i ka thënë servisit publik të Serbisë, RTS-së, se Lista Serbe është instrument i rëndësishëm për realizimin e të drejtave të serbëve në Kosovë.

"Është me rëndësi të jashtëzakonshme për serbët në Kosovë e Metohi që të paraqiten si një trup dhe unikë kundruall shqiptarëve dhe ndaj të gjithë të tjerëve, prandaj Lista Serbe është instrument i rëndësishëm i shtetit të Serbisë, Beogradit, për bashkëpunimin, komunikimin dhe luftën për realizimin e interesave tona në Kosovë e Metohi", siç e quan Gjuriq dhe Beogradi zyrtar Republikën e Kosovës.

Ai ka shtuar se zgjedhjet janë rast për serbët për të siguruar pozicion të fuqishëm në Kosovë dhe për të penguar skenarin që shumë kush do ta dëshironte ta shihte në Prishtinë, që serbët të rreshtohen në disa kolona, të jenë të përçarë, transmeton Koha.net.

"Sipas dispozitave të tyre" (e ka fjalën për Kosovën - sqarim ynë) "mjafton një deputet të jetë nga një grupim tjetër që ata e kanë spekuluar si serb dhe që pastaj të mos emërojnë në qeveri e në poste të tjera njerëz që do të bashkëpunojnë dhe veprojnë në kuadër të politikës së shtetit të Serbisë dhe të bashkëpunojnë me me Beogradin, por që të jenë njerëz që janë në funksion të Ramush Haradinajt, Hashim Thaçit dhe gjithë të tjerëve", është shprehur Gjuriq, transmeton Koha.net.

Sipas fjalëve të tij, vendimi në lidhje me daljen në zgjedhjet e jashtëzakonshme parlamentare do të merret bashkarisht.

"Ne, si gjithherë vendimin për dalje në zgjedhje e marrim bashkarisht dhe konsiderojmë se serbët duhet të tubohen fuqishëm rreth Listës Serbe dhe për këtë do të bisedojmë hollësisht ditëve në vijim", ka thënë Gjuriq.

Koha.net rikujton se dje disa parti serbe të Kosovës kanë krijuar një koalicion që do të paraqitet në zgjedhjet e paralajmëruara të parakohshme parlamentare të Kosovës, ndrësa kanë akzuar Listën Serbe dhe njerëzit e saj se nuk kanë paraqitur interesat vitale të serbëve të Kosovës .

© KOHA. Të gjitha të drejtat janë të rezervuara.

Komentet

Shto koment

Të ngjashme