Pacolli: Koalicioni AKR – Nisma do të ketë rol vendimtar në formimin e Qeverisë së re

Pacolli: Koalicioni AKR – Nisma do të ketë rol vendimtar në formimin e Qeverisë së re

25 August 2019 21:44

Kreu i AKR-së, Behgjet Pacolli ka shprehur bindjen e tij se koalicioni i partisë së tij me Nismën do të ketë një rol vendimtar në formimin e Qeverisë së re.

Përmes një komunikate për media bëhet e ditur se Aleanca Kosova e Re sot ka mbajtur takim me strukturat udhëheqëse të partisë, në të cilën ka zgjedhur shtabin qendror zgjedhor dhe shtabet zgjedhore në nivel lokal.

Në prag të shpalljes së zgjedhjeve të jashtëzakonshme parlamentare të këtij viti, me qëllim të organizimit dhe mobilizimit të degëve, nëndegëve, forumeve të partisë dhe simpatizantëve të saj, Aleanca Kosova e Re, ka mbajtur takim me strukturat udhëheqëse të partisë.

Para strukturave udhëheqëse, presidenti i Aleancës Kosova e Re, Behgjet Pacolli, ka shprehur besimin e tij që me një mobilizim të anëtarësisë dhe me një program politik zhvillimor për qytetarët e vendit, koalicioni AKR- NISMA do të bëjë ndryshimin që i duhet Kosovës.

“Ky koalicion do të këtë rol vendimtar në formimin e Qeverisë së ardhshme të Republikës së Kosovës”, ka deklaruar Pacolli. “AKR është e organizuar në shumicën e Komunave të Republikës së Kosovës dhe presim që puna jonë e sinqertë dhe dinjitoze që kemi bërë në këtë Qeveri do të përkrahet dhe vlerësohet nga qytetarët e Kosovës”.

Para strukturave të partisë kanë folur edhe kryetari i Kuvendit të Anëtarëve të AKR-së, ish-ministri i MMPH-së, Fatmir Matoshi dhe ai i Zhvillimit Ekonomik, Valdrin Lluka, të cilët kanë kërkuar nga strukturat e partisë mobilizim në këto zgjedhje, në të cilat sipas tyre koalicioni AKR-NISMA do të dalë fitues.

© KOHA. Të gjitha të drejtat janë të rezervuara.

Komentet

Shto koment

Të ngjashme