Festa e Bajramit në plazhin e Durrësit - ndryshon tradita për pushuesit nga Kosova Foto: LSA

Festa e Bajramit në plazhin e Durrësit - ndryshon tradita për pushuesit nga Kosova

11 August 2019 19:59

Festa e Kurban Bajramit i ka gjetur plazhet e Durrësit plot me pushues. Ndryshe nga vitet e tjera, këtë herë festat fetare nuk janë bërë shkak që operatorët turistikë të ankohen për mungesën e pushuesve nga Kosova në plazhe.

Tradita po ndryshon. Një drekë në plazh apo restorantet e shumta përgjatë tij, po zëvendëson çdo vit e më shumë therjen e kurbanit dhe drekat në shtëpi, raporton Tch.

Po ndonëse në plazh dreka nuk e ka aromën e shtëpisë dhe vizitat te të afërmit e miqtë nuk bëhen, kënaqësia e të festuarit nuk humbet.

Ka dhe nga ata që e kanë përgatitur më parë drekën e më pas do ta shijojnë pasditen e vonë, kur të kthehen nga plazhi në dhomën e marrë me qira. Përparësi merr plazhi, festa kthehet në një rit që nuk duhet humbur për të mbledhur familjen e për t’ju lutur Zotit për mbarësi.

“I kemi lënë të gjitha të përgatitura. Kthehemi në banesë, si zakonisht, e bëjmë drekën e Bajramit, vetëm se na mungon rrethi i ngushtë familjar. Është hera e parë që e festojmë jashtë shtëpisë”, ka thënë një pushues nga Kosova.

Tradita e të festuarit në shtëpi dhe vizitat te të afërmit, që vlerësohen edhe si një mundësi e artë për të ruajtur lidhjet dhe forcuar ato në një kohë kur emigracioni ka prekur thuajse çdo familje dhe raportet e gjakut, ka filluar të humbasë.

Komentet

Shto koment

Të ngjashme