Ministri në dorëheqje i Zhvillimit Ekonomik, Valdrin Lluka, ka thënë se pret që Telekomi i Kosovës së shpejti të kthehet në kompani fitimprurëse.
Pas mosvazhdimit të kontratës me Z-Mobile, Lluka ka thënë se tash Telekomi duhet t’i ndjekë dy rrugë për të dalë nga kriza.
“Është koha për ristrukturim nga Banka Evropiane për Rindërtim dhe Zhvillim. Nëse çdo gjë implementohet sipas rekomandimeve, mendoj se shumë shpejt do të jetë ndërmarrje fitimprurëse. Nëse s’ka punësime shtesë, nëse nuk ngarkohet me kontrata shtesë, Telekomi do të jetë kompani fitimprurëse”, ka thënë ai në Interaktiv të KTV-së.
Sipas tij, mosvazhdimi i kësaj kontrate për Telekomin do të thotë fitim më i madh. Ai ka thënë se në një periudhë nga 30 deri në 120 ditë sa është faza e tranzicionit, të gjithë abonentët do të transferohen nga Z-Mobile në Telekom.
Lluka ka thënë se urgjente për Telekomin janë investimi për frekuencën dhe mbajtja e serverëve teksa ka cekur se Telekomi s’ka investuare fare në teknologji që nga viti 2012.
Për përballjen me vendimin e Arbitrazhit që obligoi Telekomin t’ia japë 25 milionë euro Z-Mobilet, Lluka ka thënë se Kosova dhe Telekomi duhet ta shohin në dy aspekte të ndara.
“Janë dy çështje si të ndara. E para është vendimi i Arbitrazhi. Si Kosovë ne duhet të jemi të kujdesshëm ndaj tyre sepse po përçojmë mesazh te të tjerët të huaj, që mund të ballafaqohen nesër me Kosovën në Arbitrazh. Nëse nuk i zbatojmë vendimet paraqitemi si vend të rrezikshëm për investime. Nga ana tjetër nëse mendojmë se Telekomi është dënuar padrejtësisht për 25 milionë apo se mbrojtja ishte e dobët, Telekomin nuk e ndal asgjë që të bëjë padi ndaj kompanisë në fjalë e ndoshta të balancohen diku gjatë kohës sa është procesi i përmbarimit. Por me rëndësi është që 25 milionëshi duhet të trajtohet nga Telekomi”, ka thënë ai më tej.
25 milionë eurot ai ka thënë se s’mund t’i paguajë Qeveria e Kosovës.
© KOHA. Të gjitha të drejtat janë të rezervuara.
