Pacollin nuk e bind arsyetimi i MIE-së për kompaninë lobuese, shtron disa pyetje

Deputetja Fitore Pacolli, e cila e pyeti në Komision Parlamentar ministren e Ministrisë së Integrimeve Evropiane, Dhurata Hoxha, për kontratën me kompaninë lobuese amerikane, nuk është bindur nga arsyetimi i kësaj të fundit.

Ka reaguar me një postim në Facebook, duke akuzuar Ministrinë që e drejton Hoxha, se “për ta arsyetuar vjedhjen e qindra mijëra eurove nga buxheti i shtetit përdor Serbinë ku thotë ‘Duke u ballafaquar me një ofensivë të rëndë lobimi nga Serbia në të gjitha qendrat botërore të vendimmarrjes, me qindra miliona euro të shpenzuara në lobim kundër Kosovës, kjo është gjëja më e pakët që mund të bëjnë institucionet e Republikës së Kosovës’”.

“Pra më së paku që mund të bëjnë institucionet është ta vjedhin paranë publike”, ka thënë Pacolli, teksa ka thënë se “pyetja pasuese për Ministren është se a është angazhuar kjo kompani për të lobuar për Kosovën”.

“Ndoshta ka harruar por Ministrja gjatë raportimit në Komisionin për Punë të Jashtme insistonte se kompania me të cilën kishte lidhur kontratë është kompani këshilluese e jo lobuese. Fjalët e Ministres në Komisionin ishin ‘po ne kemi lidhur një kontratë me një kompani KËSHILLUESE, NUK ËSHTË KOMPANI LOBUESE, është KOMPANI KËSHILLUESE, e cila do ta këshilloj MIE-në... dhe do të na ndihmoj me çështjet e avancimin e agjendës së integrimit evropian... dhe planifikimin strategjik që MIE do ta bëjë në përgatitjen e vendit për aplikim për statusin e shtetit kandidat...”, ka thënë Pacolli.

Në fund, Pacolli ka shtruar disa pyetje që, sipas saj, Ministrja duhet të përgjigjet:

1. Çfarë kërkon emri i Kadri Veselit si personi kontaktues? Në çfarë cilësie është si kryetar i PDK-së apo si kryetar i Kuvendit?

2. Çfarë shërbimesh më konkretisht do të kryejë kjo kompani në SHBA?

3. Çfarë do t’i ndihmojë kjo kompani në avancimin e agjendës për integrim evropian?

4. A ka kërkuar Ministrja ndihmë nga shoqëria civile duke ditur që BE ka investuar në shumë OJQ të cilat janë shumë të përgatitura për ta këshilluar atë?

5. A ka kërkuar ndihmë nga vetë zyra e BE-së për t’i ndihmuar me ekspertizë?

“Nuk mjafton arsyetimi i Ministrisë”, ka thënë Pacolli në fund.

Ministria e Integrimit Evropian është sqaruar lidhur me kontratën me kompaninë këshilluese nga SHBA-ja “Madison Global Strategies LLC”.

Ata për Koha.net kanë thënë se kjo kontratë është lidhur për t’u ballafaquar me ofensivën e Serbisë kundër Kosovës.

“Duke u ballafaquar me një ofensivë të rëndë lobimi nga Serbia në të gjitha qendrat botërore të vendimmarrjes, me qindra miliona euro të shpenzuara në lobim kundër Kosovës, kjo është gjëja më e pakët që mund të bëjnë institucionet e Republikës së Kosovës”, thuhet në përgjigjen e tyre.

Ata thonë se, kjo kompani këshilluese fushëveprimin e punës dhe aktivitetet lobuese për shtetin e Kosovës nuk i ka të kufizuara vetëm në SHBA, por edhe në vendet e Bashkimit Evropian.

MIE ndër të tjera thotë se kjo marrëveshje ka qenë dhe është krejtësisht transparente dhe ligjore.

“Asnjë procedurë e vetme nuk është shkelur. Të gjitha detajet e saj janë publike dhe mund të gjenden në faqen zyrtare të Komisionit Rregullativ të Prokurimit Publik. Siç edhe mund të shihet në kontratën publike, palë kontraktuese në këtë marrëveshje janë vetëm Ministria e Integrimit Evropian dhe kompania në fjalë”, njofton ministria.

Sipas tyre, baza ligjore e Republikës së Kosovës, e lejon parimin e konfidencialitetit në rastet e lidhjes së kontratave për çështje të ndryshme me interes shtetëror.

“Mirëpo, fakti që kjo kontratë është tërësisht publike, dëshmon se nuk ka asgjë për t’u fshehur dhe është praktikë mëse normale për çdo shtet”, përfundojnë ata.

Kontrata në mes Ministrisë dhe kompanisë “Madison Global Strategies LLC” është në kohëzgjatje prej nëntë muajsh ndërkaq vlera e saj totale është 171.000,00 euro.

+ 10

Dhurata Hoxha vazhdon edhe sot heshtjen për kontratën mes Ministrisë së Integrimit Evropian të cilës ajo i prin dhe firmës lobuese amerikane “Madison Global Strategies, LLC “për konsulencë dhe planifikim strategjik”.

E kontratën, po e cilësojnë absurde dhe të dyshimtë njohës të çështjes në vend.

Ndonëse kontrata është nënshkruar nga Ministria, person kontaktues shihet të jetë kryetari i PDK-së, dhe kryetari i Kuvendit të Kosovës Kasdri Veseli.

Dje, gjatë raportimit në Komisionin për Punë të Jashtme ministrja Hoxha është pyetur për detajet e kontratës nga deputetja Fitore Pacolli, por që është akuzuar se nuk po dëshiron t’i përgjigjet në pyetjen e saj.

Deputetja Fitore Pacolli i ka thënë sot portalit Koha.net se ka dyshime për keqpërdorim në këtë kontratë, pasi që sipas saj, aty figuron edhe emri i kryeparlamentarit Kadri Veseli.

Sipas saj, kjo kontratë do të shfrytëzohet nga PDK-ja.

“Ka dyshim për keqpërdorim me këtë kontratë del se personi me të cilin kontakton kompania është Kadri Veseli. Në këtë rast Kadri Veseli është kryetar partie dhe kryetar Kuvendi, pse duhet me figuru ai me një kontratë që e ka nënshkruar Ministria e Integrimeve. Kjo i bie që kjo është kontratë që ka me u shfrytëzu nga PDK-ja”, ka thënë ajo.

Pacolli ndër të tjera ka shtuar se duhet të merren masa edhe ndaj Ministrisë edhe ndaj kryetarit të Kuvendit.

Ajo thotë se një kontratë e tillë është shkelje e të gjitha rregullave që ekzistojnë.

“Ne do të shohim se çfarë hapash do të ndërmarrim por kjo nuk duhet të mbetet me kaq. Ne duhet të ndërmarrim masa edhe ndaj Ministrisë por edhe ndaj kryetarit të Kuvendit sepse ky është keqpërdorim. Është shkelje e gjitha rregulloreve që eksitojnë”, thotë ajo.

Ajo ka thënë se ministrja Hoxha ka tentuar t’i ikë përgjigjes kur është pyetur të mërkurën në Komisionin për Punë të Jashtme.

“Arsyetimi i saj ishte se na vyn për na ndihmu sidomos për IPA-3 dhe unë i kam thënë se IPA 3 ka të bëjë me Bashkimin Evropian dhe jo me Amerikën, ajo ka thënë se po na duhet edhe në Amerikë”, ka përfunduar Pacolli.

Ndërkaq Demush Shasha nga Instituti EPIK ka thënë për portalin Koha.net se lidhja e kontratës një burimore nga ana e MIE-së përbën shkelje të Marrëveshjes së Stabilizim Asocimit.

“Në këtë drejtim, MIE ka lidh kontratat e konsulences dhe lobimit për të cilat në kuadër të procesit të integrimit evropian, brenda shteteve të BE-së ka aq shumë operatore ekonomik prestigjioz sa që në asnjë formë nuk mund arsyetohet lidhja e kontratave në burimore. Në fakt një gjë e tillë përbënë shkeljen edhe të Marrëveshjes Stabilizim Asocimit dhe kërkesave për treg të hapur dhe konkurrencë të lirë”,thotë ai.

Sipas tij, nëse institucionet e kanë vlerësuar që ka diçka konfidenciale rreth këtyre kontratave, ato është dashur të përjashtohen nga procedurat e Ligjit për Prokurim Publik, me anë të një vendimi të Qeverisë, sikur që bëhet në raste të furnizimit për FSK, Polici dhe AKI.

Sipas Shashës, MIE-së ka shkelur mandatin e MPJ-së, pasi që sipas tij, MPJ është institucion përgjegjës në Kosovë për marrëdhëniet me shtetet anëtare të BE-së dhe SHBA.

“MIE ka mandat vetëm për koordinimin e procesit integrues, në kuptimin e procesit Stabilizim-Asocimit. Konsideroj se institucionet duhet të jenë aktive në aspektin e lobimit për çështje që fuqizojnë pozitën ndërkombëtare të Kosovës. Kjo është një praktikë që bëhet në tërë boten. Por, asnjëherë institucionet nuk duhet dalë jashtë Ligjit të Prokurimit Publik, pasi që Ligji ka ofruar mundësi dhe procedura të bollshme për lidhjen e kontratave të tilla”, thotë ai.

Sipas tij, në rastet e tilla që kanë dalë në publik vërehet një numër i shkeljeve ligjore të cilat do të dëmtojnë buxhetin e Kosovës, e që sipas Shashës, do ta dëmtojnë imazhin e Kosovës pasi që janë shndërruar në skandale financiare dhe ironikisht do arrijnë të kundërtën e synimit të proklamuar.

Lidhur me këtë kontratë sot ka reaguar edhe deputeti i pavarur, Korab Sejdiu.

Përmes një postimi në Facebook, ai ka shkruar se Ministria e Integrimit Evropian ka nënshkruar kontratë qindra mijëra euro për lobim në SHBA e që sipas tij, do t’i shërbejë personalisht Kadri Veselit.

“A janë more këta në tokë të bukës! Ministria e Integrimeve EVROPIANE (jo integrimeve amerikane) nënshkruan kontratë qindra mijëra euro me kompani lobimi në SHBA (jo në BE), për me i sherby personalisht Kadri Veselit. Për këta ‘njerëz’, burgu pak është”, ka shtuar ai.

Detaje nga kontrata

Ndërkaq sekretari i Lëvizjes Vetëvendosje për marrëdhënie me jashtë, Kreshnik Ahmeti, ia ka rikujtuar ministres Hoxha se nuk është në kompetencat e saj lobimi në Amerikë.

Sipas tij, një kontratë e tillë është absurde.

Ai thotë se duhet t’i tregohet ministres se SHBA-të nuk janë në kontinentin e Evropës.

“Ministria për Integrime Evropiane ka nënshkruar kontratë me një kompani amerikane, për të siguruar takime me kongresmenë amerikanë dhe zyrtarë të administratës së presidentit amerikan, Donald Trump. Duhet t’ia përkujtojmë ministres se SHBA-ja nuk gjendet në kontinentin e Evropës, rrjedhimisht nuk janë pjesë e BE-së”, ka shkruar ai.

Ahmeti tutje ka shtuar se absurditeti tjetër i kësaj kontrate qëndron tek personi kontaktues, e që është kryetari i Kuvendit Kadri Veseli.

“Absurditetit që një Ministri e ngarkuar me çështjen e integrimeve evropiane, siguron shërbime për lobim në ShBA, i mbivendoset absurditeti tjetër, që person kontaktues për këtë kontratë të Ministrisë është Kryeparlamentari Veseli”, ka shkruar ai.

Sipas tij, kusht i domosdoshëm për integrime evropiane është lufta kundër korrupsionit. Prandaj, Ahmeti thotë se, nuk mund të ketë përparim në këto integrime me njerëz që e shfrytëzojnë vet procesin e integrimeve, për korrupsion.

Koha.net ka provuar të kontaktojë me ministren Dhurata Hoxha dhe është në pritje të përgjigjes së saj.

© KOHA. Të gjitha të drejtat janë të rezervuara.