Saraçi dhe KMDLNJ mohojnë se i kanë dhënë foto Brovinës

Behxhet Shala, kryetar i KMDLNJ-së ka mohuar se ndonjë aktivisti i këtij këshilli t’i ketë dorëzuar Flora Brovinës një foto të tillë.

“Jam shumë i sigurt që kjo foto nuk i është dorëzuar Brovinës nga KMDLNJ përndryshe ne do të ishim në dijeni për këtë. Nuk ka asnjë arsye që nëse do të kishim një foto të tillë ta dërgonim diku tjetër e mos ta mbanin për vete. Por edhe nëse do ta dërgonim së pari kjo do të kalonte përmes qendrës së KMDLNJ-së e që një gjë e tillë nuk ka ndodhur” ka thënë shkurt Shala përmes telefonit, raporton KTV.

Ndërsa Mevlyde Saraçi përmes telefonit ka mohuar t’i ketë dorëzuar këtë foto Brovinës. Saraçi ka thënë se nuk është e vërtetë kjo deklaratë dhe se ajo nuk e njeh fare atë foto. Saraçi ka paralajmëruar se për këtë deklaratë të Brovinës do t’i hap rast në polici.

Flora Brovina para mediave e ka pranuar se fotoja e publikuar nga vet ajo dje, mund të jetë e falsifikuar.

“Fotografia me gjasë është e falsifikuar. Ju kërkoj falje të gjithëve, sidomos grave të dhunuara. Mua ma kanë dorëzuar foton diku në vitin 2003 në një zarf. Nuk më ka shku mendja me verifiku sepse e kam nga 2003. Personi që ma ka dhënë është aktivist për të drejtat e njeriut por nuk ia di emrin, ia kam harruar. Ndërsa nënkryetarja e Komisionit ka qenë Mevlyde Saraçi që kemi punuar shumë bashkë. Këtë rast ajo ma ka sjellur zarfin dhe më ka thënë që kjo grua është 35 vjeçare, dhe e di rastin ”, tha ajo, raporton KTV.

Ajo ka thënë se kryetari i PDK-së Kadri Veseli nuk ka qenë në dijeni për këtë rast.

“Unë kam shumë dokumente për të dëshmuar gjenocidin. Në prokurori jam në cilësinë e dëshmitares”, tha ajo.

Kur është pyetur se a do të jepte dorëheqje nëse i kërkohet ajo tha “jam e gatshme për gjithçka në të mirë të shtetit”.

Ka përfunduar para pak çastesh intervistimi i Flora Brovinës rreth publikimit të fotografive gjatë ditës së djeshme, si dëshmi për krimet serbe në Kosovë, raporton KTV.

Ajo para pak minutash është larguar me një veturë zyrtare nga zyrat e Policisë, ku u mor në pyetje përreth 3 orë.

Deputetja e PDK-së, Flora Brovina, është paraqitur në Policinë e Kosovës ku pritet të intervistohet lidhur me fotografinë e publikuar gjatë së enjtes në hapësirat e Kuvendit të Kosovës.

Paraprakisht, në departamentin e Hetimeve të Policisë, ka mbërritur edhe prokurorja e Prokurorisë Speciale, Drita Hajdar, raporton KTV.

Derisa deputetja Brovina, ka përdorur një hyrje tjetër për të mbërritur në zyrat e këtij departamenti.

© KOHA. Të gjitha të drejtat janë të rezervuara.