Jahjaga kritikon ashpër deputeten Brovina Foto nga arkivi

Deputetja e PDK-së kritikohet nga të gjitha anët për publikimin e fotografisë, Prokuroria nis hetimet

16 May 2019 16:25
19:12

Reagime të ashpra ka shkaktuar publikimi i fotografisë së një prej viktimave të dhunës seksuale nga deputetja e PDK-së, Flora Brovina.

Ish-presidentja e Kosovës, Atifete Jahjaga, veprimin e ka konsideruar të neveritshëm e jonjerëzor, i cili, për më tepër, godet edhe një herë tjetër dinjitetin e gruas në fotografi.

“Të mbijetuarit e dhunës seksuale gjatë luftës në Kosovë nuk janë vegla që mund t’i përdorni për spektaklet e juaja politike,” thuhet në reagimin e Jahjagës.

Shkelje të dinjitetit të të mbijetuarave të dhunës seksuale të luftës në Kosovë, e ka konsideruar edhe Rrjeti i Grave të Kosovës, që u ka bërë thirrje deputetëve të kërkojnë përgjegjësi nga gjykatat për mungesë të trajtimit dinjitoz të rasteve të këtilla.

Pas këtyre zhvillimeve, ka ardhur edhe reagimi i Prokurorisë Speciale, që njoftoi se nuk kanë qenë në njohuri për rastin që portretizohet në fotografi dhe për të njëjtin do të hapin hetim.

“Prokuroria Speciale njofton që vetëm pas publikimit të fotos nga deputetja Brovina, e ka kuptuar për ekzistencën e kësaj dëshmie, pasi që deri me tani për një fotografi të tillë nuk kemi pasur informata, as nga deputetja Brovina e as nga dikush tjetër,” thuhet në reagimin e Prokurorisë.

Përderisa prokuroria ka bërë thirrje që ata që kanë dëshmi të ngjashme, t’i dërgojnë në Prokurorinë Speciale, Rrjeti i Grave të Kosovës dhe ish-presidentja Jahjaga, kanë kërkuar nga mediat që fotografia e publikuar nga Brovina, të largohet dhe të mos shpërndahet më tutje.

18:44

Kusari: Brovina shkeli privatësinë dhe dinjitetin e viktimës

Juristja e së drejtës së medias, Flutura Kusari, ka reaguar ndaj postimit të fotografisë së përdhunimit të një gruaje nga forcat ushtarake serbe.

Sipas saj, deputetja Brovina ka bërë shkelje flagrante të privatësisë dhe dinjitetit të viktimës.

Kusari ka thënë se “nëse fotografia e publikuar është autentike, deputetja e PDK-së Flora Brovina ka shkelur në mënyrë flagrante privatësinë dhe dinjitetin e viktimës dhe familjes dhe ka shkaktuar dëm të pariparueshëm”.

“Mediat duhet të tregojnë kujdes në raportimin e deklaratave të Brovinës, duke u siguruar që të mos publikojnë informacione që mund të çojnë në zbulimin direkt ose indirekt e identitetit të viktimave”, ka thënë ajo.

18:27

“Familja dhe Shpresa” proteston ndaj Brovinës për publikimin e fotografisë

Shoqata “Familja dhe Shpresa”, përmes një deklarate për media, proteston ndaj deputetes Flora Brovina dhe ndaj mediave të cilat sot kanë publikuar fotografitë e krimit të rëndë të përdhunimit të një femre nga kriminelët serbë.

“‘Familja dhe Shpresa’ i bashkëngjitet protestës të Rrjetit të Grave të Kosovës (RrGK) ndaj zonjës Brovina e cila në mënyrë të paskrupullt shkeli pa asnjë ndërgjegje mbi dinjitetin e viktimës dhe të gjitha viktimave të tjera të krimeve të rënda të luftës, në këtë rast të të përdhunuarave. Kjo është torturë e pafalshme e zonjës Brovina ndaj nesh, të mbijetuarve të luftës, për llogari politike të saj dhe rrethit të saj”, thotë kjo organizatë.

Sipas kësaj organizate, këso lloj të dëshmive duhet që të përdoren si dëshmi në gjykata, pra në hapësira të mbyllura dhe të caktuara të organeve të drejtësisë, përkatësisht atje ku duhet të trajtohen dhe gjykohen krimet e luftës dhe jo në publik.

“Dhembjet e luftës, ne të mbijetuarit ende jemi duke i përjetuar në mënyra të ndryshme tash e 20 vite, por bërja publike e dëshmive të këtilla siç bëri deputetja Brovina dhe një pjesë e mediave pa asnjë kriter moral, etik, pa asnjë ndjenjë shpirtërore e as respekti të dinjitetit për viktimën është i padurueshëm. Ftojmë dhe lusim të gjitha mediat që urgjentisht të largojnë nga faqet e tyre të internetit dhe nga llogaritë e tyre të rrjeteve sociale këto fotografi”, thotë kjo organizatë.

Në të njëjtën kohë, ftojmë edhe qytetarët të cilët pa menduar dhe pa vetëdije i kanë shpërndarë të njëjtat që t’i shlyejnë ato menjëherë nga rrjetet e tyre sociale.

18:06

Publikimin e fotos nga përdhunimi, Surroi e quan pornografi politike

Image

Shkrimtari e publicisti Veton Surroi me një postim në Facebook ka reaguar ndaj publikimit të fotografisë së përdhunimit që deputetja e PDK-së Flora Brovina e bëri sot gjatë punimeve të seancës së Kuvendit të Kosovës kushtuar krimeve të luftës bërë nga forcat serbe në Kosovë, transmeton Koha.net.

Publikimin e kësaj fotoje Surroi e ka quajtur pornografi publike.

Publikimi i një akti seksual për përfitim parash quhet pornografi.

Publikimi i një akti seksual për përfitim politik quhet pornografi politike.

Publikimi i një dhunimi quhet perverzion. Në këso rasti, politik.

16:38

RrGK thotë se Brovina shkeli dinjitetin e të të mbijetuarave të dhunës seksuale

Rrjeti i Grave të Kosovës (RrGK) ka parë me shqetësimin publikimin nga deputetja Flora Brovina të një fotografie që dëshmon dhunimin e një gruaje nga forcat ushtarake serbe gjatë luftës në Kosovë.

RrGK ka thënë se me këtë veprim, Brovina ka shkelur parimin e dinjitetit të të mbijetuarave.

“Konsiderojmë se zonja Brovina me këtë veprim ka shkelur parimin e dinjitetit të të mbijetuarave, duke kujtuar se përmes kësaj fotografie është zbuluar edhe trupi i të mbijetuarës së dhunës seksuale gjatë luftës në Kosovë. Po ashtu, zonja Brovina ka shkelur Nenin 23 të Kushtetutës së Republikës së Kosovës, i cili përcakton se dinjiteti i njeriut është i pacenueshëm dhe është bazë e të gjitha të drejtave dhe lirive themelore të njeriut”, thuhet në reagimin e RrGK-së.

RrGK ka thënë se publikimi i fotografisë është shumë shqetësues dhe ndikon në përkeqësim të gjendjes emocionale të të mbijetuarës. Po ashtu, ky rrjet ka thënë se e sheh dekurajuese për raportimin nga të mbijetuarat tjera të dhunës seksuale.

Teksa thotë se mbështet çdo rrugë institucionale, RrGK ka thënë se veprimi i Brovinës nuk ndihmon në arritjen e drejtësisë.

“RrGK kërkon nga institucionet e Kosovës që nismat që ata ndërmarrin të jenë gjithpërfshirëse, duke mos përjashtuar askënd, siç ishte Rezoluta e votuar në Kuvendin e Kosovës. Për 20 vite kanë qenë organizatat e grave ato që kanë ofruar mbështetje për këto gra e burra, derisa institucionet për 17 vite me radhë kanë qëndruar në heshtje. Në prononcim para mediave, zonja Brovina pohon se këto dëshmi janë paraqitur para organeve të drejtësisë, mirëpo sipas saj, as Prokuroria Speciale e as EULEX-i asnjëherë nuk kanë intervistuar këto viktima. Nëse kjo qëndron, RrGK mbështet fuqishëm dhe pa asnjë rezervë çdo rrugë institucionale në kërkim të drejtësisë për të mbijetuarat e dhunës seksuale gjatë luftës në Kosovë, mirëpo ky veprim i zonjës Brovina nuk ka kontribuuar në arritjen e drejtësisë, gjetjen e kryesve të këtyre krimeve apo trajtimin e dinjitetshëm të mbijetuarave të dhunës seksuale gjatë luftës në Kosovë”.

Në fund, RrGK ka kërkuar nga deputetët e Kosovës që të kërkojnë llogari nga gjykatat për mungesën e reagimit institucional dhe trajtimin dinjitoz të rasteve të dhunimeve seksuale të kryera gjatë luftës së fundit në Kosovë.

16:25

Jahjaga kritikon ashpër deputeten Brovina

Image

Ish-presidentja e Kosovës, Atifete Jahjaga, ka kritikuar ashpër deputeten Flora Brovina për publikimin e një fotografie që tregonte dhunimin e një gruaje nga forcat ushtarake serbe gjatë luftës në Kosovë.

E ka quajtur të gërditshëm, neveritshëm e të turpshëm veprimin e Brovinës.

“Një goditje e rëndë u është bërë sot mijëra të mbijetuarve të dhunës seksuale gjatë luftës në Kosovë me publikimin e pamjeve që tregojnë dhunimin e një gruaje nga forcat ushtarake serbe gjatë luftës! Është e gërditshme, e neveritshme, dhe e turpshme se si një depuetete e Kuvendit të Kosovës, e cila dikur ngriste dorën kundër të drejtave të grave e burrave të dhunuar seksualisht gjatë luftës në Kosovë, sot shfrytëzoi pikërisht godinën e Kuvendit për të publikuar para mediave një fotografi që thuhet se dokumenton aktin e dhunimit të një gruaje shqiptare nga tre ushtarë serbë”, ka shkruar Jahjaga në Facebook.

Jahjaga më tej ka thënë se publikimi i kësaj fotografie cenon rëndë privatësinë e viktimës dhe ritraumatizon të gjithë të mbijetuarit e dhunës seksuale.

“Veprimi i deputetës është joetik, joligjor, e jonjerëzor! Publikimi fotografisë cenon rëndë privatësinë e viktimës dhe mund të çojë në zbulimin e identitetit të një dëshmitareje potenciale të krimit që Serbia ka kryer ndaj popullit tonë. Publikimi i asaj fotoje ri-traumatizon viktimën dhe të gjithë të mbijetuarit e dhunës seksuale gjatë luftës në Kosovë dhe dekurajon të mbijetuarit që të dalin përpara me të vërtetën mbi krimin që është kryer mbi trupat e tyre”, ka deklaruar ajo.

Jahjaga ka kërkuar nga autoritetet drejtësisë që të hetojnë veprimin e Brovinës dhe të veprojnë në përputhje me ligjin.

“Publikimi i fotografisë është një goditje e rëndë për dinjitetin e gruas që shihet në fotografi dhe është një goditje e rëndë për luftën tonë për drejtësi për mijëra gra e burra që u bënë cak i një fushate të egër të dhunimit seksual që Serbia kreu në Kosovë gjatë luftës së 1998-1999 për ta spastruar Kosovën etnikisht nga shqiptarët! U bëjë thirrje mediave që të largojnë fotografinë nga platformat e tyre për të mos e dëmtuar viktimën edhe më shumë! U bëjë thirrje autoriteteve të drejtësisë që të hetojnë këtë veprim dhe të veprojnë në përputhje me ligjin!”, ka shtuar Jahjaga.

Në fund Jahjaga ka thënë se “të mbijetuarit e dhunës seksuale gjatë luftës në Kosovë nuk janë vegla që mund t’i përdorni për spektaklet e juaja politike”.

© KOHA. Të gjitha të drejtat janë të rezervuara.

Komentet

Bajram17/05/2019 10:33

Keto informata(fakte) dorezohen ne prokurori (pa e bo shume tmadhe neper media) deri sa ti arrestojne kriminelat, dhe nuk duhet ti kallxohen popullates (perveq nese dikush ka interes me kallë vendin me trazira)

Shto koment

Të ngjashme