1 perditesime
12:46

Musliu: Ne nuk jemi Komision hetimor, por komision puro politik

Deputetja e PDK-së, Ganimete Musliu, që është edhe anëtare e Komisionit hetimor parlamentar për deportimin e gjashtë shtetasve turq nga Kosova, tha se deputeti i LDK-së, Driton Selmanaj, e ka politizuar komisionin.

Musliu këto deklarata i dha pas mbledhjes së Komisionit ku u intervistuan shefi i AKI-së Shpend Maxhuni dhe ish-shefi i kësaj agjencie, Driton Gashi.

Selmanaj tha se PDK-ja po mundohet ta dëmtojë punën e Komisionit ndërsa Musliu tha se kolegu i saj nga LDK-ja nuk e ka lejuar Kryetarin e Komisionit që të hedh në votim propozimin e Hajdar Beqës që të dërgohet në zyrën ligjore kërkesa e Presidentit Hashim Thaçi për raportin e ekspertit ndërkombëtar, raporton Ksp.

“Këta e panë që nuk munden me i rezistu këtij vendimi dhe e lëshuan mbledhjen. Presidentin e kanë ftuar gjithmonë kur ka qenë për vizita jashtë vendit. Këto parti nuk mund të mbijetojnë skenës politike. Nuk është mbyllur takimi i rregullt, e ka mbyllur Driton Selmanaj”, tha Musliu.

Sipas saj, Komisioni është lojë dhe tendencë politike që të bëjnë politikë.

Musliu thotë se ata nuk janë komision hetimor por komision puro politik.

“E shfrytëzojmë për politikë dhe kjo vjen nga partitë opozitare”, tha Musliu.

12:39

Selmanaj: Ish-shefi i AKI-së e vazhdoi lojën e Presidentit Thaçi për dëbimin e turqve

Image

Komisioni hetimor parlamentar për deportimin e gjashtë shtetasve turq nga Kosova ka intervistuar sot shefin aktual të AKI-së Shpend Maxhuni dhe ish shefin e saj, Driton Gashin.

Intervistimi i tyre u bë me dyer të mbyllura ndërsa kjo është hera e dytë që Gashi dhe Maxhuni ftohen për intervistim.

Pas mbledhjes, deputeti i LDK-së, Driton Selmanaj, tha se Driton Gashi nuk ishte i gatshëm që të japë deklaratë pasi që, siç tha ai, “Gashi është sjellë sikurse presidenti Hashim Thaçi”.

Ai tha se deputetët e PDK-së, që janë anëtarë të komisionit, po bëjnë përpjekje për ta dëmtuar punën e Komisionit, raporton KSP.

“Nuk do të hyjmë në lojën e presidentit. Nuk do të bëhemi pjesë e skenarëve të presidentit. Nuk po dorëzohemi ta intervistojmë presidentin, ne e kemi ftuar dhe ka ardhur dhe e keni parë. Mos dëshmia e tij është dëshmi, ai nuk dëshiron të flasë, por e dimë se ai qëndron pas këtij rasti. Driton Gashi ka vazhduar lojën e presidentit”, tha Selmanaj.