Thaçi: Batalioni Atlantiku e kreu ballëhapur misionin për atdheun

Haradinaj – Batalionit Atlantiku: Si atëherë edhe sot jeni të nevojshëm për atdheun

19 April 2019 17:35
17:47

Në 20 vjetorin e themelimit të Batalionit Atlantiku, në Prishtinë u mbajt një akademi përkujtimore në të cilën kanë marr presidenti Hashim Thaçi dhe kryeministri Ramush Haradinaj.

Ramush Haradinaj tha se ende kanë nevojë për mbështetjen e tyre.

"Kur flitet për luftën e Kosovës edhe Batalioni Atlantiku e ka historinë e tij dhe krenarinë e tij. Kur e flasim historinë e Kosovës, është e dhimbshme dhe martire. Ajo që është me rëndësi ta vërtetojmë është se ka zënë vend e drejta e shqiptarëve, dhe sakrifica juaj. Serbia sot po provon të mohojë krimin që ka bërë, po provon ta ndryshojë të vërtetën, me u paraqit viktimë. Si atëherë edhe sot ju jeni të nevojshëm për atdheun”, ka thënë Haradinaj.

Ai ka shtuar se puna për atdheun ende s’është kryer dhe Kosova ka nevojë për ndihmën e të gjithëve.

“Çdo vlerë e popullit tonë na është marrë. Gjysma e popullit në Kosovë është përzënë e gjysma është detyruar të jetojë në torturë, duhet t’i tregojmë botës këtë. Kemi me qenë çdo herë bashkë mos të lejojmë dikë që të tjetërsojë të drejtën e sakrificën tonë. Kërkoj ndihmën tuaj të jemi bashkë, sepse puna e atdheut tonë nuk është kryer ende", tha Haradinaj.

17:35

Thaçi: Batalioni Atlantiku e kreu ballëhapur misionin për atdheun

Presidenti i Kosovës, Hashim Thaçi, ka marrë pjesë në akademinë e organizuar për 20 vjetorin e themelimit të batalionit “Atlantiku”, bëhet e ditur përmes një komunikate për media.

Ai ka thënë se batalioni “Atlantiku” është sinteza më reprezentative e rrethit ciklik ose katër fazave të marrëdhënieve të shqiptaro–amerikanëve me atdheun dhe Shtetet e Bashkuara të Amerikës.

“Të parët tuaj, por edhe ju, shkuat në Shtetet e Bashkuara të Amerikës, në atdheun e madh të lirisë dhe demokracisë. Shqiptarët e Amerikës kanë luajtur rol të jashtëzakonshëm dhe historik në afirmimin e çështjes së Kosovës. Në çastet më të vështira për Kosovën ishte krejtësisht i natyrshëm reagimi juaj, sepse ju e dinit kuptimin e thellë të lirisë”, u shpreh Thaçi.

Ai theksoi se batalioni “Atlantiku” është treguesi më i qartë i historisë politike dhe ushtarake të shqiptarëve, prandaj pjesëtarët e tij iu përgjigjen më së miri kushtrimit “Atdheu në rrezik, Vendlindja thërret”.

“Ju nga mirëqenia maksimale erdhët në luftë. Jeni beteja dhe fronti i luftës çlirimtare. Në kuadër të batalionit “Atlantiku”, ju luftuat drejtpërdrejtë forcat pushtuese ushtarake serbe. Misionin tuaj ndaj atdheut ju e kryet ballëhapur”, shtoi presidenti Thaçi.

Kreu i shtetit theksoi se duke mposhtur forcat serbe, së bashku me ndihmën e NATO-s, është realizuar misioni më i lartë kombëtar, patriotik dhe politik.

“Ëndrrën e gjithë gjeneratave e bëtë realitet. Ju hytë në Kosovë me ajrin e lirisë”, theksoi ai.

Në mbyllje të fazës së katërt, pas kuptimësimit të lirisë, pjesëtarëve të batalionit “Atlantiku”, Thaçi u tha se pas luftës dhe sakrificës ju u kthyet sërish në Shtetet e Bashkuara të Amerikës, tek familjet tuaja, tek profesioni, puna dhe biznesi.

“Si luftëtar ju veshët uniformat dhe morët armët në luftë për liri. Pas fitores, ju hoqët uniformën dhe ju kthyet jetës. Kështu bëjnë njerëzit e mëdhenj, ata që dinë se çka duan”, shtoi ai.

Thaçi potencoi se sa më shumë që kalon koha, aq më shumë do të shtohet vlera e luftës çlirimtare.

“Fëmijët tuaj dhe fëmijët e fëmijëve tuaj do të jenë krenarë me ju, sepse nuk lejuat që robëria e Kosovës të vazhdojë pa fund. Viti 2019 është shpallur vit i NATO-s në Kosovë”, ka thënë ai.

I pari i vendit u shpreh mirënjohës ndaj Shteteve të Bashkuara të Amerikës, NATO-s dhe shteteve të BE-së për atë që bënë për lirinë pavarësinë dhe ngritjen e Kosovës.

Po ashtu, ai theksoi se përjetë do u jemi mirënjohës dhe do të përkulemi me respekt para vëllezërve Bytyçi, heronjve të batalionit “Atlantiku” dhe gjithë heronjve të Kosovës.

© KOHA. Të gjitha të drejtat janë të rezervuara.

Komentet

Shto koment

Të ngjashme