Dekani i Juridikut në UP ankohet pse familjari i tij nuk u zgjodh asistent

Nita Shala do të duhej të niste të martën ligjërimin në katedrën e Penales në Fakultetin Juridik të Prishtinës.

Duke qenë doktor në të Drejtën Ndërkombëtare, Shala arriti të përzgjidhet në mesin e 11 kandidatëve që kishin aplikuar për dy pozitat e asistentit në këtë katedër, për çka ajo ka lidhur edhe një kontratë pune dy vjeçare.

Por, përzgjedhja është kundërshtuar nga shefi i ri i saj, dekani i Juridikut, Haxhi Gashi, i cili në Senat ishte kundër kësaj përzgjedhje.

Ai pretendon se në momentin e aplikimit, kandidatja Shala, nuk e kishte të nostrifikuar doktoraturën.

Pos dekanit, përzgjedhjen e Shalës e ka kundërshtuar edhe Triumf Sadikaj, i cili vetë ka konkurruar për këtë pozitë dhe pretendon se Shala nuk e plotëson kriterin e moshës.

Ai është vëllai i bashkëshortes së dekanit të Juridikut dhe djali i kandidatit për deputet nga PDK-ja, Beqir Sadikaj, që gjithashtu është profesor në Juridik.

Ankesa e tij u rrëzua në të gjitha shkallët brenda Fakultetit Juridik dhe në Senatin e UP-së.

Vetë Gashi ka pranuar për “Kohavisionin” lidhjet familjare me Triumf Sadikajn, por ka thënë se një gjë e tillë nuk ka ndikuar në kundërshtimin që ai i ka bërë përzgjedhjen e kandidates Nita Shala.

Gashi ka premtuar se do të përgjigjet gjerësisht për këtë edhe me shkrim, por pastaj nuk e ka bërë këtë dhe nuk u është përgjigjur thirrjeve nëpërmjet telefonit.

Nita Shala tregon se në kohën kur kishte aplikuar, diploma e saj e doktoraturës ishte në procedurën e nostrifikimit.

Vetëm Inspektorati i Punës i dha të drejtë Sadikajt dhe e vlerësoi të bazuar ankesën e tij.

Shala tregon se Inspektorati e shqyrtoi ankesën e Sadikajt duke shkelur procedurat e veta dhe jashtë kohës së lejuar për ushtrim të ankesës.

“Kohavisioni” ka pyetur për këtë Inspektoratin e Punës, por nga aty kanë thënë se vendimi është dërguar në shkallën e dytë dhe nuk do të deklarohen deri në një vendim të ri rreth kësaj çështjeje.

Ndërkaq, Shala për të nënshkruar kontratën me UP-në dha dorëheqje nga pozita e këshilltares në Ministrinë e Brendshme në Shqipëri.

Shala, gjithashtu, ka punuar në Tribunalin e Hagës për Krime në ish-Jugosllavi.