Protestojnë studentët në Shqipëri, kërkojnë anulimin e tarifave

Protestojnë studentët në Shqipëri, kërkojnë anulimin e tarifave

05 December 2018 19:51

Në ditën e dytë të protestës së studentëve të Fakultetit të Arkitekturës, Urbanistikës dhe Inxhinierisë së Ndërtimit në Shqipëri u janë bashkuar edhe studentë të fakulteteve të tjera, me kërkesën për anulimin e vendimit që tarifon kreditet për provimet përsëritëse.

Revolta e studentëve doli jashtë dyerve të universiteteve dhe shkoi pranë Ministrisë së Arsimit të Shqipërisë, transmeton TCH.

Hedhjen e stilolapsave studentët e quajtën akt simbolik, si dhe zemërimin e akumuluar me jetën universitare e shprehën me gjuajtjen e ndërtesës së Ministrisë me vezë.

Zv/ministrja e arsimit, Besa Shahini, doli jashtë ndërtesës duke kërkuar përfaqësues nga studentët për të dëgjuar kërkesat e tyre.

“Çdo përfaqësues që mund të futet aty është i shantazhueshëm. Cilido nga ne mund të pësojë presion po u fut aty. Ne nuk futemi aty. Ajo që kemi për të thënë ne është ky takimi këtu”, thanë studentët.

Dhe u largua pa u rënë në dakordësi. Vendin e saj e zëvendësoi një qytetar i thjeshtë, që përgëzoi reagimin e studentëve.

Nga ana tjetër, ministrja e Arsimit, Lindita Nikolla në një deklaratë për mediat ka reaguar për protestën: “Kërkojë anulimin e një pike të një VKM-je, por që nuk ka hyrë në fuqi për këta studentë”.

Edhe kryeministri Edi Rama në Twitter, në mbështetje të fjalës së ministres Nikolla, i ka pasuar përgjegjësinë universiteteve që të rishikojnë vendimin e Këshillit të Ministrave.

Komentet

Shto koment

Të ngjashme