Sipas Hasanit, marrëveshja e Thaçit me Serbinë e pavlefshme pa Kuvendin

Enver Hasani, ish-kryetar i Gjykatës Kushtetuese dhe njohës i marrëdhënieve ndërkombëtare, në Rubikon të KTV-së theksoi se Presidenti nuk mund të ketë mandat që të negociojë me Serbinë.

Përveç nëse delegohet nga Kuvendi.

“Presidenti nuk ka kompetenca të negociojë. Autorizimin për me negociu e jep Kuvendi përmes kompetencave që ka. Rasti i negociatave me Serbinë është e qartë sikur loti”, ka thënë ai.

Mirëpo, në këtë situatë, çfarëdo marrëveshje e nënshkruar me Serbinë prej presidentit Thaçit do të ishte e pavlefshme.

“Nuk ka mandat presidenti, çfarëdo marrëveshje është e pavlefshme”.

Hasani ka thënë se me hapjen e çështjes së kufijve është dëmtuar shtetësia e Kosovës.

Ish-kryetari i Kushtetueses e arsyeton veprimin e prokurorit Elez Blakaj, i cili u tërhoq nga çështja dhe u largua nga vendi pasi sipas tij, u kërcënua e u shantazhua.

Enver Hasani në Rubikon të KTV-së ka thënë se kishte situata kur ishte në pozitë të njëjtë dhe mund ta imagjinojë se çfarë kërcënime kanë shkuar në adresë të Blakajt.

Hasani beson se aktakuza do të duhej të ishte ndryshe.

“Mendoj që aktakuza duhet të ishte ndryshe konceptualisht”, ka thënë ai.

“Ai kur ka dal me fol në televizion, kur ka thanë më kanë kërcënu, e dëgjova Ramushin çka po thotë, po e them këtu, mundem me imagjinu se çka kanë mujt m’i thanë. 100 për qind, fare s’kam dyshim”, ka thënë Hasani.

“Pse me rezistu. Nuk është agjendë personale ajo, le të rezistojnë tjerët. Atëherë do të thotë mbylle shtetin dhe shko një shtëpi, kapitullo”, shtoi tutje Hasani.

Ai tha se Kosova është peng e 10 vetave të cilët me dhunë erdhën në pushtet dhe me dhunë po e mbajnë.

Enver Hasani i është kthyer temës se provimit të jurisprudencës së kryeprokurorit të shtetit, Aleksandër Lumezi, duke thënë se e ka për obligim që çështjen ta përcjell edhe në ekspertizë.

“Ai ia ka borxh Kosovës dhe këtij populli, le ta çon në një ekspertizë diplomën e tij. Unë kam informata të sakta, kur e kam shkruar unë rastin, në Beograd e kanë mbledh komplet dosjen dhe përmes avokatëve serbë, kanë marrë një deklaratë të ish-ministrit Drejtësisë të Kosovës, atij serbit”, ka thënë Hasani në Rubikon të KTV-së.

“Burime ndërkombëtare më kanë thënë mua që është e saktë ajo që ti e ke thënë”.

Enver Hasani, ish-kryetar i Gjykatës Kushtetuese, beson se presidenti Hashim Thaçi i është vënë pas përmes kryeprokurorit të shtetit, Aleksandër Lumezin.

Sipas tij, presidenti Thaçi i ka dhënë urdhër kryeprokurorit Lumezi që ta dëmtojë atë.

Për këtë, në Rubikon të KTV-së, Hasani thotë se e ka vërtetuar përmes dëshmitarit i cili ka qenë në të njëjtin vend kur sipas tij, presidenti ka folur me kryeprokurorin për të.

Dëshmitari, thotë Hasani, është i familjes Pacolli.

"Hashimi i ka thënë Lumezit, duke ma sha nanën, që ma ka vra Millosheviqi në derë të shtëpisë, t'u i thanë, Enver Hasanit bëja kështu, kështu akuzën", thotë Hasani t'i ketë treguar personi i tretë i cili ndodhej në atë takim të presidentit Thaçi dhe kryeprokurorit Lumezi.

© KOHA. Të gjitha të drejtat janë të rezervuara.