Kryetari i Kosovës Hashim Thaçi, sot në një prononcim, nuk ka dashur të interpretojë atë që mbrëmë i tha ambasadori amerikan Greg Delawie për mundësinë e këmbimit të territoreve në mes Kosovës e Serbisë, por tha se marrëveshja do të jetë shumë e vështirë dhe dhembshme.
Madje Thaçi në pyetjen e KTV-së për mundësinë e shkëmbimit të territoreve, ai evitoi përmendjen e këtij togfjalëshi duke akuzuar grupin KOHA se, siç tha, “sheh vetëm zi”.
Në një prononcim për medie, Thaçi ka paraparë një marrëveshje shumë të vështirë edhe të dhimbshme ndërmjet Kosovës e Serbisë.
“Me kompromise kemi ec 3 dekada. Kemi bo kompromis me partnerët tanë..nuk do të jetë betejë se kush kë do ta mund. Palët do të ndihen të dinjitetshme dhe ta implementonim marrëveshjen”, tha ai.
Ai shtoi se Kosova në asnjë rrethanë nuk guxon ta marrë përgjegjësinë e dështimit të këtij procesi sepse do të cenojë raportet me SHBA-të dhe sipas tij, nëse nuk ndodh marrëveshja do të kemi izolim
“Ne partneritetin me SHBA të duhet ta kultivojmë. Këshillat e sugjerimet kanë qenë të mirëseardhura për ne. Deklarimet e ShBA-ve duhet të merren seriozisht. Marrëveshja përfundimtare do të jetë e dakorduar me SHBA-të dhe BE-në”, tha Thaçi duke përfunduar me fjalinë e tij të rëndomtë “Kosova është vend i pavarur e sovran dhe do të arrijë marrëveshje”.
© KOHA. Të gjitha të drejtat janë të rezervuara.
