Nagavci: Nga LDK-ja nuk pranojmë kushtëzime, Kurti do të jetë kryeministër

17 October 2019 23:31
23:53

Ish-deputetja e Kuvendit të Kosovës, Arbërie Nagavci, që pritet të jetë në këtë post edhe në legjislaturën e re, ka folur në Interaktiv të KTV-së dhe edhe për vazhdimin e bisedimeve për harmonizimin e programit qeverisës me Lidhjen Demokratike të Kosovës.

Ajo ka thënë se nuk pranojnë kusht nga LDK-ja për postin e kryeministrit, teksa thotë se ka kaluar koha e pazareve politike.

“Për nesër kemi të caktuar një takim mes grupeve punuese. Në takimin e fundit që kanë pasur kryetari Kurti dhe nënkryetari Bislimi, me kryetarin e LDK-së Mustafa dhe kandidaten për kryeministre të kësaj partie, Osmani janë dakorduar që bisedat të vazhdojnë në nivel të grupeve punuese. Ne kemi votuar në Këshillin e Përgjithshëm që të jetë nënkryetari Besnik Bislimi dhe shefi i Grupit Parlamentar, Glauk Konjofca, ndërsa nga ana tjetër me sa di janë Avdullah Hoti, Kujtim Shala dhe Lumir Abdixhiku”, ka thënë Nagavci.

Ajo ka thënë se “puna e tyre është që të harmonizojnë programin qeverisës”.

“Jemi dakorduar që kryeministri të ketë vetëm 2 zëvendësministra, që qeveria të ketë 12 Ministri dhe 2 maksimum 3 zëvendësministra, në Ministri më të mëdha për shkak të fuzionimit”, ka thënë Nagavci.

Ajo ka thënë se në ditët në vazhdim pret që takimet të jenë më të shpeshta dhe intensive, “në mënyrë që pas certifikimit të rezultateve të jemi gati me harmonizimin e programit”.

Kur ka folur për deklarimet e fundit të figurave të LDK-së, veçmas Lutfi Haziri, ajo thotë se në takimet mes krerëve të dy partive nuk ka pasur kushtëzime.

“Nuk ka pasur asnjë kushtëzim, as diskutime për ndarje të posteve. Ka pasur vetëm dakordim për numrin e ministrive. Nuk ka pasur ndonjë kushtëzim, dhe besojmë se kushtëzimet nuk duhet të jenë pengesë për vazhdimin e bashkëpunimit”, ka thënë ajo.

“Qytetarët e kanë thënë fjalën e tyre. Ajo që është me rëndësi është se opozita e djeshme do të jetë qeveri e re, dhe na vjen mirë që edhe LDK-ja ka fituar. Ne e kemi pranuar si kërkesë legjitime të LDK-së që të pritet deri në certifikimin e rezultateve. Ndërkohë pati deklarata nga z. Haziri se Vjosa Osmani duhet të jetë kryeministre. Është dëshirë e natyrshme kjo e tyre, por tani jemi në një situatë te re. Ne kemi bërë ofertë që të shkojmë në listë të përbashkët dhe asaj t’i prijë zonja Osmani, nuk kanë pranuar. Qytetarët e kanë shprehur vullnetin e tyre, Lëvizja Vetëvendosje është partia e parë dhe z. Kurti do të jetë kryeministër i ri i Kosovës, sepse legjitimitetin ja kanë dhënë populli”, ka thënë Nagavci.

“Duhet të vihet standard i ri në politikë, koha e pazareve politike ka përfunduar, koha kur partitë me pak përqindje qeverisin po ashtu ka kaluar. Ne nuk pranojmë kushtëzime, kushti i vetëm që e kemi është ndryshimi i qeverisjes së deritanishme”, ka thënë më tej ajo.

Nagavci ka thënë se për postin e kryeministrit kanë vendosur qytetarët, ndërsa ka shtuar se me LDK-në do të diskutojnë për pozitën e kryeparlamentarit.

Sipas saj, fillimisht do të bëhet harmonizimi i programit, ndërsa ka përsëritur se Ministria e Drejtësisë, ajo e Brendshme dhe ajo e Financave janë synim i VV-së.

Nagavci ka deklaruar se edhe porosia e miqve, me të cilët janë takuar pas 6 tetorit, ka qenë që sa më shpejtë të themelohen institucionet. Ka deklaruar se qeveria duhet të bëhet para muajit dhjetor, duke marrë parasysh se Ligji për Buxhetin duhet të miratohet sivjet.

“Nëse hyjmë sërish në zgjedhje, marrim më shumë se 50 për qind”

Nagavci ka thënë po ashtu se nëse LDK-ja nxjerr kushtëzime dhe detyrohen të shkojnë në zgjedhje, Vetëvendosje, sipas saj, do të fitojë më shumë se 50 për qind të votave.

Ajo ka thënë se do të respektojnë simbolet e shtetit të Kosovës “pasi është obligim kushtetues, dhe çdo obligim ligjor e kushtetues do ta respektojmë”.

“Presim opozitë konstruktive, siç ishim ne”

Nagavci tutje ka thënë pret që PDK-ja e AAK-ja të jenë opozitë konstruktive që mbajnë përgjegjës qeverinë për çdo vendim.

Ka thënë se edhe VV-ja në të kaluarën ka qenë opozitë e tillë.

“Pres të jenë opozitë konstruktive që do të na mbajnë të përgjegjshëm për çdo vendim. Edhe ne ishim sepse kemi kundërshtuar vendimet që ishin të dëmshme e me Qeverinë Kurti s’do të ketë asnjë vendim në dëm të vendit. Është vërtetuar që çdo kundërshtim që kemi pasur ka qenë i drejtë e është shumë fatkeqësi që qëndrimet tona s’janë marrë për bazë me kohë. Jemi detyruar të përdorim forma të cilat s’ishin në vullnetin tonë, por ishim të detyruar ndaj vendimeve të padrejta. S’do të ketë më vendime që nxisin deputetë të veprojnë në forma jo të pëlqyeshme, por konsiderojmë se çdo pyetje, do të marrë përgjigje”, ka thënë ajo.

Ajo ka thënë se kalimi i disa deputetëve të VV-së në PSD dhe dështimi i kësaj të fundit në zgjedhjet e 6 tetorit, “është porosi”. E ka quajtur kapitull të mbyllur ndarjen e tyre.

Për deklaratën e Sali Zybës të VV-së që tha se kryetari i Prishtinës Shpend Ahmeti “mund të zgjedhë vetë vendin ku të jetojë pas 6 tetorit”, Nagavci ka deklaruar se “ishte deklaratë e keqkuptuar” dhe se “VV-ja do të lë prapa rastet e tilla për hatërmbetje”.

“Nëse dikush ka zgjedhur të vazhdojë një rrugë me AAK-në, më s’ka nevojë të diskutohet. Për rastet korruptive, të dyshimta, aferat do t’i dërgojmë në organet përkatëse. Do të krijojmë kushte që secili të bëjë punën e vet”, ka thënë ajo tutje.

Për rastin e vdekjes së aktivistit të VV-së Astrit Dehari, Nagavci ka përsëritur kërkesën e VV-së që sa më shpejtë të publikohet në origjinal dhe në gjuhën shqipe raporti i institucionit zviceran.

23:31

Nagavci: Zvarritja e numërimit të votave, pasqyrë jo e mirë

Arbërie Nagavaci e Vetëvendosjes ka thënë se vonimi i numërimit të votave po tregon pasqyrë jo të mirë për procesin zgjedhor në Kosovë.

Pas vendimit të KQZ-së që të dërgohen në rinumërim edhe 530 vendvotime, Nagavci, në Interaktiv të KTV-së, ka thënë se është mirë që të bëhet eliminimi i çdo dyshimi eventual për manipulime me vota.

“Nëse ka shkelje, secili duhet të mbajë përgjegjësi”, ka thënë ajo, teksa ka thënë se komisionerët e VV-së ishin të përgatitur e të këshilluar vazhdimisht që të “ruajnë e të përcjellin drejt vullnetin e qytetarëve”.

Për vendimin e KQZ-së që të mos numërojë rreth 4500 fletëdërgesa nga diaspora, për shkak të ardhjes së tyre me vonesë, Nagavci ka thënë se presin që pas ankesës në Panelin Zgjedhor për Ankesa dhe Parashtresa të mundësohet ky numërim.

“Janë mbi 4500 fletëdërgesa. Secila mund të ketë më shumë vota. Është mohim i një të drejte kushtetuese sepse siç është kuptuar, të gjitha dërgesat janë përcjellë me kohë, por për shkaqe teknike s’janë pranuar dhe vlerësojmë se është jo e drejtë të mohohet vullneti i tyre. Secila votë duhet të numërohet, pas vendimit të KQZ-së jemi ankuar në PZAP e besojmë se PZAP-ja do të marrë kërkesën tonë e do të numërohet çdo votë”, ka deklaruar më tej ajo.

Ajo ka thënë se janë një numër i madh i aktivistëve dhe qytetarëve që kanë ardhur fizikisht në Kosovë edhe në mënyrë të organizuar edhe si familje për të votuar.

Ajo ka thënë se kjo nuk është hera e parë, që mërgata vazhdimisht ka ditur të përfshihet në proceset e rëndësishme për vendin.

“Ne besojmë se vota e gjithsecilit duhet të numërohet, edhe për shkak të obligimit kushtetues, por edhe për të vlerësuar kontributin e tyre në secilin proces”, ka thënë ajo.

© KOHA. Të gjitha të drejtat janë të rezervuara.

Komentet

Shto koment

Të ngjashme