7 perditesime
22:23

Pacolli nuk pret që koalicioni me Nismën dhe PD-në t’i fitojë zgjedhjet

Behgjet Pacolli nga koalicioni Nisma-AKR-PD ka deklaruar se nuk pret që koalicioni ku ai bën pjesë t’i fitojë zgjedhjet e 6 tetorit.

Edhe pse kandidati për kryeministër nga ky koalicion Fatmir Limaj ishte shprehur se do të fitojnë, Pacolli ka thënë se “nëse kjo është shprehje dëshirash, atëherë po, edheu në po them se do të fitojmë”.

Ai madje ka akuzuar të tjerët për mashtrime në zgjedhje.

“Duhet të them se është e vështirë, por s’jemi të rryer të bëjmë kombinimin e numrave e këto, ata dinë më mirë. Po them se ata janë më mjeshtër se ne. Ne besojmë në atë mrekullinë, sinqeritetin e vetëdijen e qytetarëve. Shpresoj në të. Sigurisht, rezultati del si del, besoj se do të jemi bashkë në qeverinë e ardhshme. Është kuazi e pamundshme që qeveria e ardhshme të formohet pa prezencën e koalicionit tonë. Ta dija sa do të fitojmë, sot do të filloja të festoj. Nuk e di sa do të fitojmë. Nëse është kjo shprehje e dëshirave edhe unë po them se do të fitojmë. Nuk di. Sidoqoftë e respektojmë çdo rezultat që del prej zgjedhjeve. E dimë se jemi pak a shumë viktimë e të qenit minoritarë në këtë drejtim për arsye se partitë tjera po bëjnë çmos nganjëherë madje edhe duke dhunuar qytetarin, duke gënjyer me premtime, premtime dhe vetëdija është kjo që është. Po frikësohem se qytetari është i dhunuar”, ka thënë ai.

Pacolli ka thënë po ashtu se “nëse s’e kalojmë pragun shkojmë në shtëpi, s’ka problem”.


Pacolli: Matoshi s’jep leje për hidrocentrale

Behgjet Pacolli, kryetar i AKR-së, ka thënë se Fatmir Matoshi, ministri në largim i Mjedisit, nuk ka dhënë leje për hidrocentrale, pas raportimeve se ai ka hapur rrugë për shqyrtimin e kërkesave për leje mjedisore për hidrocentrale, duke hequr pezullimin që ishte vënë vitin e shkuar.

Dje kryeministri në largim Ramush Haradinaj deklaroi se s’do të lejojë zbatimin e vendimit të Matoshit, duke shtuar se do të merret me rastin.

“Jam i bindur se kryeministri s’është informuar drejtë. Është informuar gabimisht. Zoti Fatmir Matoshi s’ka dhënë leje për askënd. Leje s’jep ministri. Leje jep ligji. Është e vërtetë që ai ka kërkuar prej komisionit parlamentar ku ishte ai amendamentimin e ligjit për hidrocentrale, duke ditur se ka pas diskutim, ku s’është prekur ligji nga kryeministri e kryeparlamentari. Por Matoshi s’ka nënshkruar asnjë koncension, asnjë leje s’ia ka dhënë askujt. E kam thirrur Matoshin mbrëmë dhe më ka thënë se s’ka dhënë asnjë leje, s’jep ministri leje, por jep ligji. Një e vërtetë është që ai ka kërkuar amandamentimin. S’di për çfarë është fjala. Hidrocentralet s’kanë marrë leje nga ministri Matoshi. Është e vërtetë që ekziston një letër që i është drejtuar sekretarit që të punohet vetëm konform ligjit edhe nëse ka dëshira nga kushdo. Kjo është përgjigja e tij dhe jam i prirur t’i besoj”, ka deklaruar Pacolli.

22:04

Pacolli: Cilido që bëhet kryeministër do ta heqë taksën, Haradinaj më kryefortë

Sipas Behgjet Pacollit, kushdo që bëhet kryeministër pas zgjedhjeve të 6 tetorit do të vendosë për heqjen e taksës ndaj mallrave serbe. Këtu ka përjashtuar vetëm kryeministrin në largim, Ramush Haradinaj, të cilin e ka cilësuar si kryefortë.

“Kur kemi filluar të flasim për zgjedhjet, isha i ftuar në një emision në televizion publik dhe ishte pyetje çka duhet të bëhet me taksën. Po e përsëris, ai fitues i zgjedhjeve, ai kryeministër i ardhshëm që thotë se taksën do ta mbajë, gënjen. Në mënyrën më humane po e them: Gënjen. Unë ekskludoj Haradinajn nga këtu sepse e njoh si kryefortë dhe kur fiksohet në diçka s’mund ta lëvizësh në atë. Ai nuk lëviz”, ka deklaruar fillimisht ai.

Sipas tij, taksën do ta heqin edhe ata që e kanë mbështetur e që kanë thënë se s’do ta heqin.

Për Haradinajn ka thënë se “edhe ai mund të dalë nga premtimi, por që ai do të ecën përpara me taksën”.

“Mendimi është se ai s’mund të bashkëjetojë me taksën, por mundet edhe me e heqë nëse dëshiron të mendojë më gjerë, kurse tjerët do të heqin taksën e të lirojnë rrugën për dialog. Ky është realiteti, të presim pas zgjedhjeve”, ka shtuar Pacolli.

21:55

Pacolli: Hoxhaj tha se është dakorduar me amerikanët për taksën, s’doli të jetë ashtu

Bengjet Pacolli, zëvendëskryeministër në largim, ka akuzuar zëvendëskryeministrin tjetër në largim Enver Hoxhajn, se kishte mashtruar për punën e taksës.

Duke folur për vendimin për taksën dhjetë për qind ndaj produkteve serbe, Pacolli ka thënë se Hoxhaj ishte zotuar se ka marrë miratim të ambasadës amerikane për këtë çështje. Megjithatë, sipas Pacollit, kjo s’doli të jetë e tillë.

“Në seancë pash se ishte në rend dite. Kam afër zotin Hoxhaj. E pyes, sepse ai donte të merrte privilegjin me anoncu se ishte ai që e propozon taksën. Unë i thash ‘të lutem Enver çka është kjo punë’. Në pyetjen time u koncentrua edhe kryeministri edhe zëvendëskryeministri Limaj. Më tha ‘e kam kryer me amerikanët. Vetëm sa erdha nga ambasada, kam diskutuar me amerikanët, është kryer kjo punë, ecim përpara’. Ne votojmë të gjithë, u bë vendim i mirë, sepse na konvenonte duke pa sjelljet e Serbisë, dhe isha i sigurt se kjo u diskutua me ambasadën amerikane, por doli që s’ishte e vërtetë, që askush s’kishte diskutuar me ambasadën amerikane”, ka deklaruar Pacolli.

“Për mua quajeni mashtrim, gënjeshtër, apo si të doni, por s’ishte e vërtetë. Kjo është e vërteta. S’isha vetë, ishim disa që e dëgjuam”, vazhdoi ai.

Pacolli po ashtu ka thënë se vendimi për taksën 100 për qind “ishte efektiv për dy muajt e parë e më pas u banalizua”.

Behgjet Pacolli në Rubikon të KTV-së ka thënë se ndonëse e votoi vetë, taksa ishte gabim, duke shtuar se “mallrat serbe ishin të pranishme në Kosovë me ambalazh të vendeve të tjera”.

21:45

Pacolli thotë se votimi për Ushtrinë ishte i ngutur dhe pa miratim nga miqtë ndërkombëtarë

Sipas Behgjet Pacolli, zëvendëskryeministër në largim, votimi për Ushtrinë ishte bërë në një kohë jo të duhur.

Ai ka thënë se nuk beson që Kosova kishte miratimin e miqve ndërkombëtarë për të vazhduar me atë proces.

“Nuk besoj se ka pasur miratim nga miqtë ndërkombëtarë. S’kam qenë në krejt bisedat që ka pasur kryeministri, por mendoj se është dashur të pritet një momentum tjetër. Është dashur të punohet për forcimin e FSK-së, nëse kem pas ndërmend të blejmë diçka, t’i blejmë FSK-së. Them se ka qenë e ngutur”, ke deklaruar ai.

“Ushtria po, në moment të caktuar, por jo kështu si u bë. Për arsye sepse akoma s’kemi miratimin e NATO-s edhe tani”, ka shtuar Pacolli.

Pacolli ka përmendur edhe tentimin për anulimin e Gjykatës Speciale, si një “tjetër gabim të Qeverisë Haradinaj”.

“Tendenca për anulimin e Gjykatës Speciale ishte tendencë që s’iu nevojit Kosovës. Kredibiliteti jonë aty u humb. Është e pamundur sot të nënshkruash kontratë e nesër në shtëpi të thuash se jo kam gabuar. Ti ke nënshkruar, duhet ta implementosh”, ka deklaruar ai.

21:38

Pacolli: Mustafa, një prej kryeministrave më të mirë që kishte Kosova

Behgjet Pacolli ka folur për qeveritë që ka pasur Kosova, duke dhënë vlerësimin për to.

Ndonëse nuk ishte pjesë e saj, Pacolli tha se qeveria e Isa Mustafës ishte qeveria më efikase që kishte Kosova.

Ai ka thënë se Isa Mustafa ka qenë një ndër kryeministrat më të mirë që kishte Kosova.

“Isa Mustafa ka prodhuar momente civilizuese dhe sot jam i bindur që Isa Mustafën askush s’mund ta akuzojë për dështime jomorale. Është një prej kryeministrave më të mirë që ka pasur Kosova. Kam biseduar edhe me presidentin e Kosovës që ishte ministër i Mustafës. Zoti Thaçi ka shumë vlerësime për punën e Isa Mustafës. Ajo që jam i bindur është se kur kam biseduar diçka me Mustafën ke mundur të ecësh përpara. Ishte njeri i fjalës”, ka thënë Pacolli, duke vazhduar se cilësia e njëjtë e ka përcjell edhe kryeministrin Haradinaj. “Nëse je marrë vesh me Ramushin diçka, është kryer ajo punë”, ka thënë ai.

21:35

Pacolli thotë se Mustafa ia dha dritën e gjelbër që të shkonte në Qeveri me PAN-in

Kryetari i AKR-së, Behgjet Pacolli, ka thënë se kishte marrë dritën e gjelbër nga kryetari i LDK-së, Isa Mustafa, për të kaluar në anën e koalicionit PAN për të formuar Qeverinë Haradinaj.

Pacolli që kishte hyrë me LDK-në në koalicion paszgjedhor, me pak deputetë kishte kaluar pas zgjedhjeve te PAN-i për të ndihmuar arritjen e numrave për formimin e Qeverisë. Këtë ka thënë se e ka bërë me lejen e Mustafës.

Teksa ka akuzuar LDK-në për vjedhje të votave brenda listës së koalicionit LAA, Pacolli ka thënë se pas zgjedhjeve kishte provuar të bashkonte LDK-në e VV-në për të qeverisur vendin, pasi PAN-i s’kishte numrat.

“Unë kisha 35 mijë vota dhe isha në vendet e para dhe do të ishte e drejtë që LDK-ja të më ofronte bile një post, në komisione, apo të jem anëtar i ndonjë komisioni diku. Nëse unë pranoj të jem me një pik timin. S’kam marrë asnjë propozim që të marr ndonjë vend në komisione të ndryshme dhe filloj të punoj që të dy liderët, VV e LDK t’i afroj me njëri-tjetrin. Është e vërtetë, këtë mund ta konfirmojnë edhe Kurti edhe Mustafa, sa herë kemi shtruar tavolinën për dy vetë ku i kam ftuar që të bisedojnë. Gjithmonë më ka ardhur njëri, por tjetri s’ka ardhur. Insistoja që VV-LDK të bënin qeverinë sepse PAN-i s’arrinte të bënte qeverinë. Për dy muaj kam insistuar deri sa u kam dhënë edhe ultimatum që keni edhe një muaj. E kam pritur deri në ditën e fundit kur e kam thirrur Mustafën e jemi ulur në një restorant. Isha me Jetlir Zyberajn dhe i thash çka të bëjmë. Më tha ‘kam ardhur te ti, por Kurti jo’. Edhe njëherë kur ka ardhur ai, kishte ardhur vetë me një arrogancë të paparë. I thash Isë çka të bëj, për arsye se nëse kaloj në anën tjetër bëhet qeveria formohet e ecim përpara. Ju nuk keni shans të formoni qeveri duke mos u takuar. Thotë ‘unë po të isha në vendin tënd e kisha bë këtë që do ta bësh, për mua është e dhimbshme, por do ta bëja këtë’. Sinqerisht kështu më ka thënë. Jam i lumtur që ka ndodhur ky takim, e po të thoshte Isa Mustafa jo s’ke për të shkuar, e lëmë vendin në bllokadë, ndoshta s’do të shkoja”, ka thënë Pacolli.

Këtë veprim, sipas Pacollit, Mustafa e ka bërë për të ndihmuar Kosovën.

21:23

Pacolli: Kam dëshmi që AKR i ka fituar zgjedhjet e 2007-s

Behgjet Pacolli në Rubikon të KTV-së ka thënë se në zgjedhjet e 2007-s partia e tij kishte fituar zgjedhjet mirëpo abuzimi me votë bëri që ai të dalë në opozitë.

Ai ka thënë se ka parë se partia e tij kishte 28 për qind, por në fund rezultatet ranë në vetëm 13 për qind.

“Erdhën zgjedhjet, ne kaluam sfidën e parë. U radhitëm si partia e tretë. Kam dëshmi sot se AKR-ja ishte fituese e atyre zgjedhjeve. Unë i kam pa rezultatet e AKR-së diku ka ora 11:30 minuta në televizionet e Kosovës që AKR-ja i ka pas 28 për qind. Në një televizion e kam parë. Më kanë thirrur nga Gjakova, kryetari i degës, më tha të fillojmë festën se ne kemi 28 për qind. Sa kam biseduar me të, kam parë në televizion 13 për qind. Kemi mbet aty. S’isha aty, por ajo që më kanë thënë është se është abuzuar me votën e AKR-së. Kemi pas në të gjithë vendin nga 13 për qind. Dikush i ka rënë sharrë”, ka deklaruar ai.

21:18

Pacolli: Kam parandaluar shumë të këqija në këtë vend

Kryetari i AKR-së, Behgjet Pacolli, në Rubikon të KTV-së, ka thënë se gjatë punës së tij të deritashme në politikë ka parandaluar shumë të këqija në Kosovë.

Duke folur për kthimin në Kosovë dhe përfshirjen në skemën politike të Kosovës, Pacolli ka thënë se kishte hyrë në zgjedhje me program të mirë, “që tash e 14 vjet s’ka pasur program më të mirë”.

“Ishte fundi i vitit 2006, më bindën që duhet të eci përpara, ishin zgjedhjet dhe ne u futëm në zgjedhje, pa eksperiencë, por me një program shumë të mirë ekonomik, të cilin e punova vetë, ashtu siç e shihja që Kosova duhet të zhvillohet. E rishikoj shpesh këtë program dhe e rilexoj, jam i bindur se është më i mirë se çdo program që i është ofruar deri tash Kosovës”, ka thënë Pacolli.

“Kam kontribuar aq sa kam mundur. Konsideroj se kam parandaluar shumë të këqija në vend”, ka thënë tutje ai.