Kandidati për kryeministër, njëherësh kryetar i Lëvizjes Vetëvendosje, Albin Kurti ka qeshur kur është pyetur nga qytetarët live në Rubikon të KTV-së, për raportin me PSD-në.

Kurti, nuk ka dashur të flasë për të kaluarën me ta e për PSD-në. I ka konsideruar si “borë e parvjetme, iku”.

“Ende po flet për ta?”, ka pyetur me humor Kurti.

“Të flasësh për PSD-në është si të flasësh për borën e parvjetme. Të privilegjuarit dolën, prej kur dolën u zvogëlua pabarazia në Vetëvendosje”, tha ai.

Kurti ka thënë se largimi i tyre ishte aksident dhe se “gipsin e kemi hequr para një viti”.

“Ta kesh kryetarin e Prishtinës, kryetarin një komune tjetër dhe 12 deputetë e ne e kundërshtojmë, e të mos guxosh të dalësh vet në zgjedhje, është vdekje për së gjalli. Më i guximshëm po del Fatmir Limaj”, tha ai.

Kurti: Nëse bëhem kryeministër, Osmanin e bëj kryeparlamentare

Albin Kurti, kandidat i VV-së për kryeministër, ka thënë se nëse ai fiton në zgjedhjet e 6 tetorit, pas fitores, kandidaten e LDK-së Vjosa Osmani, do ta bëjë kryeparlamentare.

Ai ka thënë në Rubikon se nëse nuk fiton VV-ja, “do të mbetet shteti i kapur dhe PDK-ja në pushtet”.

Një teori që PDK-ja e VV-ja të jenë bashkë në opozitë, sipas Kurtit, është e pamundshme. “Jemi dy pole. O ne o PDK-ja”.

“Nesër kemi mbledhjen e Këshillit të Përgjithshëm. Më mandatojnë për kryeministër. Pas fitores, unë e bëj e zonjën Vjosa kryeparlamentare. Nëse s’jemi të parët, nuk shoh ç’kapje të shtetit”, ka thënë ai duke shtuar se nëse LDK-ja fiton dhe i ofron VV-së bashkëpunim, “në situatë të tillë hipotetike duhet të kthehem te këshilli i përgjithshëm”.

Sipas tij, VV-ja do të fitojë më shumë se 1/3 e ulëseve në Kuvend me synimin që të marrë rreth 250 mijë vota.

Duke komentuar kundërkandidatët, Kurti ka thënë se ka respekt për Osmanin e LDK-së, ndërsa për Kadri Veselin e PDK-së, Ramush Haradinajn nga koalicioni AAK-PSD dhe Fatmir Limaj nga Nisma-AKR, ka thënë se “ata tashmë i takojnë së kaluarës, dhe po sillen si opozitarë”.

“Tre udhëheqësit e PAN-it që kurrë mos na u ktheftë në Qeveri”, ka thënë ai.

Kurti tregon se a do të shkojë si kryeministër te varri i Rugovës

Kandidati për kryeministër, njëherësh kryetar i Lëvizjes Vetëvendosje, Albin Kurti, është përgjigjur në pyetjen se a do ta vizitojë varrin e ish-presidentit Ibrahim Rugova.

“Janë gjeste simbolike ku s’dua ta vë theksin. S’po them që kurrë s’do ë t shkoj. Ka dallim shumë të madh mes Albin Kurtit të Vetëvendosjes e Albin Kurtit kryeministër. S’do të jem arrogant ndaj opozitës. Madje, do të bashkëpunojë me ta. Unë s’do t’i shaj opozitarët e institucionet, për hir të pozitës që do të kem”, tha ai në Rubikon.

Kurti do shërbim të detyrueshëm ushtarak, 3 muaj verës e 3 dimrit

Kreu i Lëvizjes Vetëvendosje, Albin Kurti, është shprehur për shërbim të detyrueshëm ushtarak.

“Mendoj se duhet të kemi shërbim të detyrueshëm ushtarak, për 6 muaj. Dhe këtë, 3 muaj verës dhe tre muaj gjatë dimrit. Përveç atyre që nuk duan, nuk e duan armën, që duhet të kryejnë shërbimin civil”, ka thënë Kurti në Rubikon të KTV-së.

Ai ka thënë se kjo gjë duhet të bëhet në koordinim edhe me partnerin në qeveri. E me LDK-në, në diskutimet parazgjedhore ka thënë se nuk e kanë diskutuar këtë çështje.

Kurti: Nuk jam për tarifën por reciprocitetin e plotë

Kandidati për kryeministër, njëherësh kryetar i Lëvizjes Vetëvendosje, Albin Kurti, ka folur edhe për kundërshtimin e planit Ahtisaari.

“Republika e Kosovës është edhe Republika e Ahtisaarit. Synojmë të kemi 2/3 e deputetëve serbë që do të na nevojiten, për punët e planet që kemi, dhe jo vetëm politike”, tha Kurti në Rubikon.

Kurti ka folur edhe për pikat e mundshme në bashkëpunim me LDK-në. Ka thënë, se jo të gjitha pikat i lidhin bashkë me këtë parti.

Kurti ka folur edhe për taksën ndaj Serbisë.

“Ne i kemi thënë kryeministrit të kaluar mos ta heqë. Ne besojmë se reciprociteti i plotë ndërkombëtarë e politik është zgjidhja e duhur përpara. Nuk jam për tarifën, por reprocitetin e plotë, kjo është edhe më e fortë”, tha ai.

Kurti ka thënë se Qeveria në krye me të, do të jetë e para që do t’i jep prioritet minoritetit serb. “Ne do të provojmë t’ fuqizojmë, t’i ndihmojmë, sepse këta liderë serbë, përfaqësojnë popullin në Kosovë”, tha ai.

Tri parime për dialogun me Serbinë, sipas Kurtit

Kandidati i VV-së për kryeministër, Albin Kurti, ka thënë se nëse ai do të qeverisë me vendin në mandatin e ardhshëm, do të ndjekë tri parime në dialogun me Serbinë. Ka thënë se nuk e kundërshton dialogun, por e do dialogun me parime.

Ai ka thënë se në legjislaturën e ardhshme duhet të ketë konsensus nacional dhe se duhet forcuar patjetër shtetin, sepse “kur e ke shtetin përtokë, ambiciet e Serbisë rriten”.

“Nëse ne kemi skandale qeveritare, migracion, arsim përtokë ku maturanti jonë është sa semimaturanti në Evropë, normalisht që Serbia thotë ma jep këtë, ma jep atë. S’mund të presim që pafundësisht të zvarriten raportet me Serbinë, por duhet të dalim në trend pozitiv zhvillimit. Të hyjmë në këtë trajektore e të zhvillojmë dialogun. Duhet të kemi tri parime në raport me dy vjetët e shkuara në raport me Serbinë. 1. Jo marrëveshje pa dialog, 2. Jo dialog me harta, 3. Jo harta me presidentë mbi to”, ka theksuar ai.

Kurti ka thënë se patjetër Kosova duhet të bëjë të ditura kërkesat, para se të ketë takime me palën serbe. Sa i përket Luginës së Preshevës, Kurti ka thënë se duhet reciprocitet i të drejtave.

“Lugina e ka shansin unik të shfrytëzojë kapitujt 23 dhe 24 të negociatave për anëtarësim të Serbisë në BE. Diskriminimi dhe shfrytëzimi është i pashembullt. Së dyti duhet reciprocitet. Më shumë ka shqiptarë në Serbi, se serbë në Kosovë. Duhet theksuar. Negociatat janë fushëbetejë. S’i dimë rezultatet. S’duhet të presim çka kërkon Serbia për të kërkuar edhe ne. Unë s’mendoj që duhet të hyjmë në pazare territoriale. Duhet të konsolidohet shteti. Duhet të angazhohemi maksimalisht për të drejtat e tyre si shqiptarë dhe t’i faktorizojmë ata shqiptarë. Kur Serbia nuk më njeh mua, as unë s’kam pse ta njoh atë”, ka shtuar ai.

Kurti: Ne do ta formojmë fondin sovran

Kandidati për kryeministër, njëherësh kryetar i Lëvizjes Vetëvendosje, Albin Kurti, ka thënë se ai në qeverisje, do ta formojë fondin sovran.

Kryeredaktori i Kohës Ditore, Agron Bajrami, e ka pyetur për atë se ata janë paraqitur si qendër e majtë, dhe se si do t’i zgjidhë problemet me ndërmarrjet e mëdha si ajo e energjisë ose Telekomin, që është në prag të falimentimit.

Kurti tha se bordet e drejtorëve, menaxhmentet, janë si mos më keq.

“Duhet formuar fondi sovranizues. Ndërmarrjet publike me ia marrë Qeverisë. Ndërmarrjet shoqërore mi bë bashkë, dikur prej mërgatës që ka përvojë në tregje ndërkombëtare, i raporton Kuvendit të Kosovës, ndalen abuzimet e kështu”, tha Kurti në Rubikon.

Kurti ka thënë se kjo s’është bërë deri tash sepse “kanë blerë qindra hektarë me 10 euro hektarin”.

Kandidati për kryeministër i VV-së ka thënë se deri tash, Qeveria ka punuar vetëm me humbje.

“Me qeverisjen tonë, do të marrim vendim për Gjykatën komerciale”.

Kurti për dosjet ndaj Mustafës: Qyteti është vrarë, drejtësia duhet të vije

Kur është pyetur për 70 dosjet kundër administratës së Isa Mustafës në Komunën e Prishtinës, që me të ardh në pushtet Vetëvendosje me Shpend Ahmetin i kishin dërguar në Prokurori, Kurti ka folur për një vetting në dy faza në sistemin e drejtësisë.

fazën e parë, do të ftonim edhe ndërkombëtarët që do t’i bënin vetting strukturave të sigurisë dhe drejtësisë. Ata që s’e kalojnë vettingun, jo vetëm duhet të përjashtohen, por edhe te hetohen. Faza e dytë është që të ketë vetting çdo 5 vjet. Veç se kemi nevojë që ne t’i marrim ndërkombëtarët, e jo ata të na marrin neve”, ka thënë ai.

Kurti ka thënë se e pranon se reforma në drejtësi nuk mjafton.

“Ajo është vetëm për qëndrueshmëri, ndërsa na duhen më shumë veprime konkrete të menjëhershme”, ka thënë Kurti në Rubikon të KTV-së.

E kur i është kthyer përgjigjes në pyetjen konrete të Betim Musliut të KDI-së, ai ka thënë se “nuk e di se si janë shkruar ato kallëzime penale e kush e ka hedhur akuzën, por e di që mafia e ndërtimit para se të vjen Vetëvendosje në pushtet ka lulëzuar”.

“Krimet ekzistojnë. E ki kufomën e vrasjen, vrasësi mund të sillet për rrethana të caktuara, derisa të vjen dënimi. Por këtu ka ndodh krimi. Qyteti është vrarë”, ka thënë ai.

Ai ka përmendur vrasjen e Rexhep Lucit dhe luftën tre drejtorëve të Vetëvendosjes, Liburn Aliu, Xhelal Sveçla dhe Sali Zyba.

“Shpend Ahmeti nuk e ka bërë këtë. E mira është që nuk i ka penguar këta tre”, ka thënë ai. “Momentin që kanë dal nga Komuna drejtorët tanë atëherë është ulur gardi dhe u është thënë kriminelëve të ndërtimit, burra urdhëroni”, ka thënë ai.

“Ne nuk do të bëjmë drejtësi, do ta mundësojmë atë”, ka thënë Kurti.

Kurti: Kur të ndërrohet Qeveria, presidenti Thaçi do të bjerë

Kandidati për kryeministër, njëherësh kryetar i Lëvizjes Vetëvendosje, Albin Kurti, ka folur edhe për reformat në sistemin e drejtësisë.

Agron Bajrami, e ka pyetur edhe për atë se si do të ishin marrëdhëniet e një kryeministri të ardhshëm me presidentin në këtë rast, nëse do të bëhej Kurti. 

“Presidenti do të bashkëpunojë me ne, ai duhet. Ai do ta kuptojë që duhet ta lëshojë atë vend. Kur të ndërrojë qeveria duhet të ndërrojë edhe presidenti. Thaçi është pjesa më e lehtë e punës, do të shkarkohet kollaj”, tha Kurti në Rubikon.

“Çka ka bërë ai dy vitet e fundit dihet se shpejt shkarkohet”, tha Kurti, duke shtuar se pasuria e paligjshme që i ka bërë politikanët njerëzit më të pasur, do të marrë fund.

Kurti: Qeveria e fundit ishte qeveri e terpisë

Kandidati i VV-së për kryeministër, Albin Kurti, ka thënë se Qeveria Haradinaj ishte qeveri e terpisë.

“Qeveria e fundit ishte e babëzisë, terpisë. Gjyshja ime thoshte ‘a e ka grykën e uritur, apo syrin. Grykën edhe e ngopim, po syri e pi ujin e detit’. Qeveria e fundit ishte e terpisë”, ka deklaruar ai në Rubikon të KTV-së.

Ai ka përjashtuar çdo mundësi të koalicionit paszgjedhor me PDK-në duke thënë se kjo parti duhet të dalë në opozitë, “përndryshe shteti mbetet i kapur”.

“S’bëhem kryeministër me PDK-në. Bëhem me VV-në e kam dashur të jem me LDK-në. LDK-ja ka bashkëmenaxhuar, por s’e ka kapur shtetin”, ka thënë ai.

Kurti tregon se si do të sjellë mentalitet të ri në sistemin gjyqësor

Albin Kurti, kandidat për kryeministër nga Lëvizja Vetëvendosje, ka folur edhe njëherë për ç’kapjen e shtetit.

“Hajnat në burg”, tha Kurti në Rubikon duke thënë se qeverisja e ardhshme do ta ketë prioritet gjyqësorin.

“Duhet të kemi kujdes jo vetëm të mos japim amnisti, por edhe prokuroria jonë të mos i ngatërroj gjërat”, tha ai.

Kryeredaktori i Kohës Ditore, Agron Bajrami, e ka pyetur se si do ta heqë ndikimin politik nga gjyqësori dhe si do të ketë mentalitet të ri të sistemit, kur që 20 vjet funksionon njëjtë.

“Kur unë të jem kryeministër, menjëherë e kthej Elez Blakajn në Kosovë. Askush s’do të guxoj t’i thotë hajn i pulave. S’do të guxoj askush t’i thotë më hajn i pulave një prokurori. Nuk vjen në konsiderim që ekzekutivi mos ta mbrojë Qeverinë. Sot në Kosovë s’ka pushtet të 3-të. Hajnat do të shkojnë në burg”, tha ai.

Kurti tha se buxheti për gjyqësorin s’është as 5 për qind i buxhetit të shtetit.

“Ne buxhetin s’do ta çojmë në autostrada të mbyllura, do bëjmë autostrada të hapura që i lidh komunat. E s’i mbyll fshatrat”, tha ai.

Kurti thotë se parulla “Isë, Isë, argati i Serbisë” ishte e aktualitetit politik

Betim Musliu nga IKD, i është kthyer akuzave që VV-ja ia ka bërë Isa Mustafës dhe LDK-së në kohën sa ishte në qeveri me PDK-në, e kur thirrej me parulla “Isë, Isë, argati i Serbisë”.

Në Rubikon të KTV-së, ai e ka pyetur se çka ka ndryshuar brenda kësaj periudhe që çoi në ndryshimin e qasjes së VV-së ndaj LDK-së.

Kurti ka thënë se opozitarizmi i dy viteve të qeverisjes Haradinaj i ka përafruar.

“Kishte një përpjekje për ta falur veriun, dhe bashkëpunimi opozitar për ta ndalur këtë duhet të ndodhte. Sa i përket parullave që i përmende, ka dy lloje të parullave, aso të përhershme dhe aso rrethanore. Ato kanë qenë parulla të aktualitetit politik. Kanë qenë parulla rrethanore kundër Zajednicës”, ka thënë Kurti.

“A kemi probleme në të kaluarën, a kemi dallime në të sotmen, po. E vërteta është që për një interes madhor, në rrethana të caktuara ne kemi marrë vendimet e duhura. Interesi madhor sot është që PDK-ja të shkojë në opozitë. Që u bashkuam, nuk do të thotë se u bëmë vëllezër e motra, e as që u martuam”, ka thënë Kurti.

Kurti: Për koalicionin paszgjedhor me LDK-në duhet të shohim kush bëhet deputet

Albin Kurti, kryetar i Vetëvendosjes, ka thënë se kjo parti e sheh LDK-në si partnere në një qeveri nëse VV-ja fiton zgjedhjet, por ka shtuar se duhet të ketë kujdes kush fiton në LDK.

Në Rubikon ai ka thënë se nuk ka pasur qëllim jo të mirë me letrën publike drejtuar LDK-së siç kishte thënë Isa Mustafa.

“S’doja numër 50 sepse doja të isha afër, jo larg. Thoshin që janë partia e parë, më të fuqishmit. Mendoj se ka thënë qëllimkeqe. Nëse s’ka pasur qëllim të mirë, kanë mundur të testojnë. Qëllimi im ishte i mirë. Kam pas argumente. Efekti i sinergjisë është fantastik. Por shkoi ajo punë. S’kemi opsion tjetër, por duhet të jemi të kujdesshëm kush fiton në LDK”, ka thënë ai.

Kurti ka shtuar se “ka provuar t’ua heq frikën LDK-së nga PDK-ja, por ata duan më shumë që ta luftojnë vetë këtë frikë që e kanë ndaj PDK-së”.

Për largimin e deputetëve të VV-së në drejtim të PSD-së, Kurti ka thënë se “në VV u krye krasitja, tjerët le të ruhen”.

Kurti: Frikësohem nga frika e LDK-së ndaj PDK-së

Albin Kurti, kandidat për kryeministër nga Lëvizja Vetëvendosje, ka thënë se e ka vetëm një brengë nga situata që është krijuar lidhur me Lidhjen Demokratike të Kosovës.

Ka thënë se “i frikësohet frikës së LDK-së që e ka ndaj PDK-së”, përcjell Koha.net.

“Është enigmatike për mua. Kjo më brengos. U tha që nuk duhet të ketë garë teë brendshme, por garë të brendshme do të ketë gjithmonë. Po të ishte Vjosa numër 1 unë numër 2 do të kishte një sienergji”, tha Kurti në Rubikon.

Kurti: Sëmundja është PDK-ja, ilaçi është Vetëvendosja

Kreu i Vetëvendosjes, Albin Kurti, ka thënë se nuk ka kuptim Qeveria dy vjeçare.

Prandaj oferta e tij drejt LDK-së ka qenë që të bëhen bashkë për së paku dy mandate.

“Meqë prioritet është luftimi i korrupsionit, dhe Vetëvendosje nuk është provuar asnjëherë në qeveri aq më pak me PDK-në, ishte e natyrshme që ne të qeverisim në mandatin e parë. Ata as nuk më thanë po as jo, por takimet vazhdonin. Prandaj, unë vazhdoja që të mbajmë ato takime”, ka thënë Kurti.

Ai ka thënë se PDK-ja tashmë po flasin si opozitë

“Ata janë bërë gati për opozitë, ata po e dinë që tashmë janë në opozitë”, ka thënë Kurti. “Ne edhe LDK-ja do të bëhet qeveria e ardhshme. Por ne donim që Qeverinë ta bëjmë parazgjedhjeve, se e dinim se shumë institucione do të çliroheshin ende pa ardh ne zyrtarisht në Qeveri. Sëmundja është PDK-ja, ilaçi është Vetëvendosja”, ka thënë ai.

Kurti: Haziri më i gëzuari për dështimin e koalicionit VV-LDK

Albin Kurti, kryetar i Vetëvendosjes, ka thënë se nënkryetari i LDK-së Lutfi Haziri ishte më i gëzuari që dështoi marrëveshja për koalicion parazgjedhor mes dy partive.

Sipas tij, Haziri që s’kishte fituar asgjë as në LDK duke mos marrë kreun, e as kandidaturën për kryeministër ishte më i lumturi në takim, ku u pa që s’mund të arrihej marrëveshje.

“Nënkryetari që s’kishte fituar asgjë ishte më i lumturi prej tyre. As kryetar, as kandidat. Vërehej nga qeshja e disponimi”, ka thënë ai në Rubikon.

Kurti: LDK-ja kishte druajtje, nuk deshi të fitojë me ne e tash do të fitojmë pa ata

Albin Kurti, kandidat për kryeministër nga Lëvizja Vetëvendosje, ka sqaruar edhe njëherë pse LDK-ja s’iu bashkua në koalicion parazgjedhor.

“Provuam shumë, provuam gjatë por pati druajtje që të ngjallë një koalicioni që do të shkaktonte tronditje të klanit PRONTO. Do të garojmë vet, si VV, kështu kemi qenë edhe më herët. Në 2017 e vuri si mungesë fitoren tonë PAN-i, këtë herë u shpartallua PAN-i. Kanë mundur të fitojnë me ne, tash ne fitojmë pa ta”, tha Kurti në Rubikon të KTV-së, transmeton Koha.net.

Kurti tha se druajte, ka pasur me gjasë se LDK-ja ka qeverisur bashkë me PDK-në dy mandate.

“Pati druajtje, por hollësitë nuk i di. Frika që kishin nga e ardhmja e përbashkët kundrejt PAN-it sidomos PDK-së, ishte më e madhe. Isha i bindur se bashkë i fitojmë 70 deputetë e të tjetër votojnë për vend të 3 e 4. Fitorja jonë ishte pozitive. z.Mustafa dhe unë nuk e kemi befasuar njçri tjetrin. Me vet faktin që do ta kemi përballë PDK-në, më shumë kanë frikë se dëshirë. S’mund të flas me emra por aty ka druajtje të madhe. Ndoshta vjen edhe prej asaj që kanë qenë bashkë me PDK në dy qeverisje. Ka garancion që PDK mbetet në opozitë”, ka thënë Kurti.

..