Vështrime

Një nënadmiral prorus në Berlin, politikanë që adhurojnë Putinin, një korrespondent skandaloz

Në krizën e Ukrainës Berlini është duke luajtur një rol tmerrësisht të pavendosur dhe të rrezikshëm.

■ Kriza në Ukrainë si rrjedhojë e kërcënimeve ushtarake ruse ka shpërfaqur një problem tjetër: problemin gjerman. Që në Gjermani ka disa politikanë me ndikim që mbajnë qëndrime proruse apo ambivalente ndaj Rusisë, ka qenë e ditur. Ish-kancelari Gerhard Schröder është lobist me pagesë i Rusisë. Schröder është përpjekur ta arsyetojë aneksimin e Krimesë nga Rusia duke thënë se edhe Perëndimi e ka shkelë të drejtën ndërkombëtare me ndërhyrjen në Kosovë, ndonëse Krimeja dhe Kosova janë të pakrahasueshme.

■ Në Partinë Socialdemokrate ka disa politikanë që duan të mbajnë qëndrim asnjanës ndaj krizës në Ukrainë. Shpesh ata fajësojnë edhe Perëndimin “për vringëllim shpatash”.