Vështrime

Darka e Dubait dhe turistët nga Tirana

Ishte çështje ditësh kur në Dubai do të shihej duke shijuar jetën ndonjë politikan shqiptar. Tani kjo është dokumentuar me video: kësaj radhe në metropolin e Emirateve të Bashkuara Arabe bënin qejf ministra e zyrtarë të qeverisë «socialiste» të Tiranës, ndërsa pandemia si gati kudo dhe në Shqipëri bën kërdinë. Shqipëria është në prag të fushatës elektorale dhe gjasat që rrethanat e kësaj darke të sqarohen janë të vogla. Fundja, kanë ndodhur në Shqipëri skandale edhe më të mëdha dhe nuk kanë pasur asnjë konsekuencë ligjore.

Javën që po shkon gazeta britanike «Financial Times» botoi një tekst mbi Dubain në kohën e pandemisë. Thelbi i shkrimit ishte ky: ndërsa shumë metropole të botës po qëndrojnë të mbyllura, Dubai po shndërrohet në qytet të ndejave, drekave, darkave e «netëve të çmendura» të turistëve nga bota e jashtme, sidomos europianëve. Në Dubai pothuaj nuk ka kufizime. Aty-këtu distancë sociale, por përditshmëria ecën si para pandemisë. Pse jo një darkë në Dubai?