Vështrime

Oportunistët edhe për një përdorim

Thaçi i realizoi qëllimet që ia vuri vetes nga fillimi i vitit - ta rrëzojë Qeverinë Kurti dhe ta instalojë qeverinë e udhëhequr nga LDK-ja, të cilën do ta manipulojë për aq kohë sa do t'i nevojitet. Kësaj radhe LDK-ja nuk e zvarriti marrëveshjen për punën se kush do të jetë kryetar i shtetit në mandatin e ardhshëm, sepse kjo tashmë është thuajse e qartë. Dhe këtë gëzim "e ndau" me qytetarët e Prishtinës, me një torturë fishekzjarrësh që zgjatën 10 minuta

Politikanët do të duhej të mendoheshin dy herë para se të bëjnë postime në FB, e mbase i pari, Avdullah Hoti, i porsazgjedhuri kryeministër, shembull tipik i oportunistit, që edhe ndërron qëndrime e edhe i ha fjalët e veta. Natyrisht, sa herë që preket interesi i tij personal e edhe i atyre që e sollën në kolltukun e të parit të ekzekutivit.

Avdullah Hoti, FB, 27 mars 2018: "Dalja e Listës Serbe nga koalicioni qeverisës konfirmon vërejtjet që kemi bërë me rastin e themelimit të Qeverisë, kur votimi i saj u vonua derisa nuk mbërritën nga Beogradi deputetët e Listës Serbe.