Vështrime

Kosova duhet të shkojë në zgjedhje, edhe pse nuk i konvenojnë askujt

Kosova po përjeton ndasitë më të mëdha politike në historinë e saj. Fjalori që përdorin udhëheqësit politikë ka devijuar nga sjellja e njerëzve të rritur dhe ata i ngjasojnë Shqipërisë. Kur presidenti i quan kryeministrin dhe bashkëpunëtorët e tij “grup kriminal”, kur ish-ministri i Jashtëm flet për frikë nga “terrorizmi shtetëror”, kur nuk shihet mundësia e kthimit të arsyes, nuk ka rrugëdalje tjetër pos zgjedhjeve të jashtëzakonshme, që do të jepnin së paku përgjigje në dilemat që janë krijuar nga vetë politikanët. Kush do të mund të flasë në emër të qytetarëve? Edhe pse asnjërës parti nuk do t’i shkonin në favor, ato janë të domosdoshme
 

Kroacia më datën 5 korrik do t’i zhvillojë zgjedhjet. Nuk mund të quhen të jashtëzakonshme, sepse edhe ashtu ato është dashur të zhvilloheshin këtë vit. Pra, viti 2020 është vit zgjedhor dhe kurdo që të zhvillohen janë në orarin e duhur. Por zakonisht në Kroaci zgjedhjet zhvillohen në vjeshtën e vonë. Kësaj radhe partia në pushtet HDZ (Bashkimi Demokratik Kroat) ka vlerësuar se mund të përfitojë nga përballja e suksesshme me krizën e shkaktuar nga koronavirusi, që i ka rritur popullaritetin, dhe të zhvillojë zgjedhjet në verë. Analistët thonë se një arsye tjetër është se në vjeshtë Kroacia do t’i ndiejë pasojat ekonomike të krizës më shumë sesa tani. Do të jetë ndër vendet e BE-së që më së shumti do të goditet nga kriza, pasi më shumë se asnjë shtet tjetër varet nga turizmi. Pra, koronavirusi nuk është pengesë për zhvillimin e zgjedhjeve, por ka ndikuar që ato të zhvillohen më herët.