Saranda Bogujevci, nënkryetare e Kuvendit të Kosovës, në emisionin “Tempus” në KTV, tha se çështja e të zhdukurve me dhunë, është ndër temat më të ndjeshme në vendin tonë.
Kjo sipas saj, për faktin se është ende një numër i familjarëve, të cilët kërkojnë anëtarët e familjeve të tyre.
“Çështja e të zhdukurve me dhunë siç i referohemi, por që është, e përfshinë edhe pjesën e të zhdukurve në aspektin përtej kësaj, është njëra nga temat që ende e kemi më të ndjeshme në vendin tonë, për shkak që kemi ende një numër të familjarëve që kërkojnë anëtarët e familjeve të tyre dhe është ndër proceset ndoshta më të vështira në të cilën kanë kaluar familjarët në vendin tonë, po edhe që e kemi pas domethënë si vend në ballafaqim. Janë procese të ndryshme domethënë që kanë kalu në vazhdimësi, janë elemente që trajtohen përbrenda vendit tonë që janë të rëndësishme në kuadër të, në kuadër të asaj se çfarë i ofrohet familjarëve dhe si trajtohet çështja e familjarëve”, tha Bogujevci.
Ajo tha se ka edhe procese tjera që ndërlidhen direkt me pjesën e Serbisë, ku përmendi faktin që nuk janë marrë ende të dhënat nga Serbia, për ta ditur se ku janë më të dashurit tanë.
“Në secilën pjesë të institucioneve i kemi obligimet tona, të cilat duhet t’i adresojmë. Përfshi këto edhe në Kuvend, ku kemi edhe Komisionin që thirret specifikisht në pjesën e çështjes së personave të zhdukur dhe që mendoj që duhet të jetë më aktiv në fakt në këtë temë edhe pse jam pjesë e atij institucioni, prapë mendoj që nuk bëhet mjaftueshëm karshi asaj nga se çka mund të bëjmë si Komision pa marrë parasysh përbërja pozitë apo opozitë”, tha Bogujevci.
© KOHA. Të gjitha të drejtat janë të rezervuara.
