Drejtori ekzekutiv në Qendrën Kosovare për Studime të Sigurisë (QKSS), Mentor Vrajolli, ka thënë se dështimi në rastin në veri ka ndodhur te KFOR-i, për shkak që sipas tij, ata kanë marrë përsipër të ofrojnë siguri në atë pjesë të vendit.
Vrajolli në emisionin “Tempus” në KTV, ka thënë se barrierë ka qenë edhe pamundësia që FSK-ja të shkojë në veri, në mënyrë që t’i asistojë Policisë së Kosovës.
“Njëfarë forme është edhe një barrierë ku FSK nuk është se është pranu nga KFOR-i që të kalojë në pjesën veriore që t’i asistojë Policisë së Kosovës. Në këtë rast mund të them se nga dështimet më të mëdhaja ka ndodhë tek KFOR-i për faktin se ata kanë marrë për sipër që të ofrojnë këtë vakumin e sigurisë që në raste të caktuara ndoshta kish mund ta mbulojë FSK-ja, për faktin se pjesa veriore nuk është njëjtë si pjesët e tjera veriore”, ka theksuar Vrajolli.
Ai ka deklaruar se dështim është edhe se vija kufitare nuk ka qenë e kontrolluar sa duhet.
“Në atë se pse ka ndodhë, a kanë dështuar institucionet e sigurisë në përgjithësi, mendoj që ka një lloj dështimi. Dështim që vija kufitare nuk ka qenë e kontrolluar aq sa duhet, këtë e dëshmon arsenali i armatimit që është vendosur në Manastir. Po edhe mjetet të cilat janë pendor, sidomos mjetet motorike që disa prej tyre kanë rezultuar të jenë të blinduara domethënë mjete ushtarake”, është shprehur Vrajolli.
