TEMPUS

Dugolli: Serbia mohon masakrat e dokumentuara, s’mund të presim marrëveshje ndërkombëtare

Enver Dugolli, deputet i Grupit Parlamentar të Lëvizjes Vetëvendosje, në emisionin “Tempus” të KTV-së, ka thënë se Serbia ende mohon masakrat e dokumentuara dhe se nuk mund të pritet marrëveshje ndërkombëtare.

Ai ka thënë se Serbia i mohon edhe masakrat e dokumentuara nga misioni verifikues i OSCE, siç është masakra e Reçakut, si dhe deklarojnë çdo ditë që nuk ka ekzistuar apo nuk ka qenë masakër.

“Si kemi me pritë që ata të pajtohen për një marrëveshje”, ka shtuar Dugolli.

Tutje, ai ka thënë se është skeptik se Serbia do të pranojë një gjë të tillë, sepse sipas tij çdo ditë po japin argumente që nuk janë të interesuar që të normalizojnë marrëdhëniet me Kosovën, duke theksuar se përkundër kësaj po japin sinjale që u ka mbetur peng çështja e Kosovës, që t’i rikthejnë trupat e tyre ushtarake e policore.

“Në asnjë moment nuk po japin sinjale që janë të interesuar ta mbyllin këtë çështjen e luftës me një kërkim falje, apo me një lloj marrëveshje për shkëmbimin e këtyre informacioneve. E kemi rastin për çështjen e të zhdukurve, ka mbet peng e refuzimit të Serbisë çështja e të zhdukurve, sepse refuzojnë ata. Pse refuzojnë, sepse nuk duan që të thonë në fjalinë “të zhdukurit me dhunë”, por të zhdukurit me dhunë janë ata, sepse nuk janë zhdukur ata prej dëshire edhe prej një dite me diell u zhdukën”, ka shtuar Dugolli.