Tregtimi i aksioneve të rrjetit social Twitter u ndërpre, pasi aksionet u rriten mes raportimeve se njeriu më i pasur në botë, Elon Musk, ka vendosur ta çojë përpara marrëveshjen e tij prej 44 miliardë dollarësh për ta blerë kompaninë pas disa muajsh beteja ligjore, raporton Bloomberg.
Musku ofroi blerjen e kompanisë me bazë në San Francisco me 54.20 dollarë aksionin.
Sipas burimeve të Bloomberg, shefi i Teslas e bëri propozimin përmes një letre drejtuar bordit të Twitterit.
Musku është përpjekur të tërhiqet nga marrëveshja për disa muaj pasi nënshkroi për ta blerë platformën e rrjeteve sociale në prill. Aksionarët e kanë miratuar tashmë shitjen. Musku pretendoi se Twitteri nuk e ka treguar saktë numrin e llogarive të rreme në platformë. Twitteri e paditi atë kur Musku njoftoi se marrëveshja nuk do të realizohej.
Gjyqi që kërkon të detyrojë Muskun ta blejë Twitterin do të nisë në Gjykatën e Delawares më 17 tetor.
Argumenti i Muskut për largimin nga marrëveshja - është mbështetur kryesisht në pretendimin se Twitteri ka keqinterpretuar mënyrën se si mat madhësinë e llogarive të "spam bot" që janë të padobishme për reklamuesit. Por shumica e ekspertëve ligjorë besojnë se ai u përball me një betejë të vështirë për të bindur gjyqtaren Kathaleen St. Jude McCormick se diçka ka ndryshuar që nga marrëveshja e tij me Twitterin në prill.
© KOHA. Të gjitha të drejtat janë të rezervuara.
