Arabia Saudite ka bërë të ditur të enjten, se do të lansojë një program trajnimi me qëllim që të dërgojë astronautët e saj, përfshirë një grua, në hapësirë vitin e ardhshëm.

Mbretëria është duke e promovuar në mënyrë aktive shkencën dhe teknologjinë si pjesë të planit të saj për ta ngritur ekonominë dhe për ta reduktuar varësinë nga nafta, raportoi Associated Press të enjten.

Plani, i cili u bë i ditur nga Princi i Kurorës, Mohammed bin Salman, bën thirrje po ashtu për integrim më të madh të grave në fuqinë punëtore. Arabia Saudite hoqi në vitin 2018 një ndalim të grave për vozitje të veturave.

"Programi i astronautëve saudit, i cili është një pjesë integrale e vizionit ambicioz të Mbretërisë 2030, do të dërgojë astronautët sauditë në hapësirë ​​për të ndihmuar në shërbimin më të mirë të njerëzimit”, tha Komisioni i Hapësirës Saudite në një deklaratë.

Arabi i parë që udhëtoi në hapësirë ​​ishte Princi i Arabisë Saudite, Sulltan bin Salman, një gjysmëvëlla i princit të kurorës dhe një pilot i forcave ajrore, i cili ishte pjesë e ekuipazhit prej shtatë anëtarësh të misionit Discovery të NASA-s më 1985. Ai më vonë shërbeu si kreu i Komisionit të Hapësirës Saudite nga viti 2018 deri në vitin e kaluar, kur u emërua këshilltar i mbretit Salman.