Tech

iPhone i ri do të jetë i disponueshëm edhe në Rusi

Rusët do ta kenë mundësinë të blejnë Apple iPhone 14 e ri, pavarësisht se kompania amerikane e teknologjisë është larguar nga ky vend, ka thënë të enjten një zyrtar i lartë qeveritar për agjencinë e lajmeve “RIA Novosti”, transmetoi “Reuters”.

Rusia ka njoftuar një skemë në mars, ku autorizoi shitësit të importonin produkte nga jashtë pa lejen e pronarit të markës tregtare.

I pyetur nëse iPhone i ri, i prezantuar nga Apple të mërkurën, do të importohet sipas skemës, Ministri i Tregtisë dhe Industrisë, Denis Manturov ka thënë se nëse konsumatorët duan t’i blejnë këta telefona, do të ketë mundësi.

Apple ndaloi shitjet e produkteve të reja në Rusi në mars, një javë pasi ky vend pushtoi Ukrainën, megjithëse iPhone, MacBook dhe mallra të tjera të Applet kanë mbetur të disponueshme në dyqanet ruse pasi shitësit me pakicë shesin stokun e tyre të mbetur të modeleve të vjetra.

Rrjeti celular rus MTS, të enjten në mëngjes po shiste modelet e reja të iPhone 14 me para-porosi. Çmimet fillojnë nga 84,990 rubla (1,398 dollarë) për versionin 128 GB.

MTS-ja tha se dorëzimi mund të zgjasë deri në 120 ditë dhe ruan të drejtën për të anuluar porositë nëse përballet me vështirësi në importimin e produkteve.