Sport

Kosova publikon 12-shen për ndeshjet para-kualifikuese, mungon Lis Shoshi

Federata e Basketbollit ka publikuar listën përfundimtare prej 12 basketbollistëve për dy ndeshjet e shkurtit, kundër Irlandës dhe Azerbajxhanit, për para-kualifikimet e Kupës së Botës 2027.

Në njoftim, FBK-ja ka thënë se listës së mungesave i është shtuar edhe Lis Shoshi. Bashkë me Shoshin si të lënduar nuk janë grumbulluar as Erjon Kastrati e Domenic Artis. Ndërsa Jan Palokaj nuk ka kompletuar dokumentacionin.

Sfidën e parë, Dardanët e kanë më 22 shkurt (sot) ndaj Irlandës në Prishtinë (19:00), derisa sfidën e dytë ndaj Azerbajxhanit më 25 shkurt në udhëtim.

Kosova është në grup me Zvicrën, Irlandën dhe Azerbajxhanin.

Në fazën tjetër kalon direkt vendi i parë, ndërsa vendi i dytë më i mirë nga tre grupet e para-kualifikimeve gjithashtu do ta ketë biletën për në kualifikimet e rregullta.