Një ofertë prej 5 milionë eurove ka mbërritur në adresën e Clujit, për futbollistin kosovar, Ermal Krasniqi. Kështu ka shkruar të premten mediumi “prosport.ro”.
Kjo ofertë e jashtëzakonshme për Krasniqin ka ardhur nga skuadra e Al-Riyadhit, dhe gjasat që ai të transferohet në elitën e futbollit arab brenda pak ditësh, janë të mëdha.
Por klubit rumun, sipas këtij mediumi, nuk i ka pëlqyer mënyra e pagesës së transferimit të tij.
Arabët kërkojnë që pagesa për Kransiqin të bëhet në disa këste.
Megjithatë, gjasat që Krasniqi të largohet nga futbolli rumun janë të mëdha.
24-vjeçari Krasniqi u transferua te Cluji në janar të këtij viti për 200 mijë euro.
Në sezonin e fundit, Krasniqi luajti në 22 ndeshje për Clujin në të gjitha garat dhe realizoi pesë gola e dhuroi dy asistime.
Krasniqi debutoi edhe me Përfaqësuesen e Kosovës në duelin kundër Bjellorusisë.
