Pesëmbëdhjetë gola e tri asistime është bilanci i Vedat Muriqit në edicionin 2022/2023 të La Ligas spanjolle. Sulmuesi kosovar ka luajtur në 35 prej 38 ndeshjeve të Mallorcas. Ka startuar në 34 ndeshje dhe shumicën prej tyre i ka kompletuar. Vetëm në një ndeshje u aktivizua si zëvendësues.

Sulmuesi i Kosovës ka shënuar shumë gola vendimtarë për Mallorcan, që përfundoi e nënta në kampionatin spanjoll me 50 pikë. Ka shënuar edhe shumë gola të bukur. Por cili ishte goli më i bukur i tij në edicionin që përfundoi të dielën.

“Golat për sulmuesin janë si fëmijët. Pra, ju nuk mund ta lini asnjërin jashtë. Të gjithë golat ishin të mirë, por nëse duhet ta zgjedh njërin, atëherë është ai ndaj Espanyolit. Ishte gol shumë, shumë i mirë”, ka thënë Muriqi për faqen zyrtare të Mallorcas.

Ndaj Espanyolit, 29-vjeçari ka shënuar dy gola këtë edicion. Të parin më 28 tetor, nga afërsia me lëvizje akrobatike. Por Muriqi e ka pasur fjalën për golin e shënuar më 25 shkurt. Shënoi gol maestral me goditje nga distanca me këmbën e majtë. Muriqi goditi me të parën nga rreth 18 metra largësi dhe topi përfundoi në rrjetë.

Nga 15 gola në La Liga i kanë shënuar edhe Antoine Griezmann i Atletico Madridit dhe Borja Iglesias i Betisit. Më shumë se Muriqi gola kanë vetëm Robert Lewandowski (23), Karim Benzema (19) dhe Joselu i Espanyolit.

Muriqi ka shënuar thuajse gjatë tërë kampionatit, ndërsa së fundi realizoi të dielën në fitoren 3:0 ndaj Rayo Vallecanos.

Është edicioni më i suksesshëm i tij, marrë për bazë nivelin ku luan. 15 gola i kishte shënuar edhe për Fenerbahçen në edicionin 2019/2020 të Superligës së Turqisë. Për Rizesporin në edicionin 2018/19 të Superligës së Turqisë i kishte shënuar 17 gola. Shifrën prej 17 golave e arriti edhe me Giresunsporin në edicionin 2015/16, në kategorinë e dytë të Turqisë.

Por La Liga është tjetër nivel. Dhe bilanci i Muriqit është shumë i mirë. Ai është përshtatur shumë mirë te Mallorca dhe ka përkrahjen e të gjithëve. Përkrahjen e jashtëzakonshme e ka shpërblyer me gola dhe me luftë të madhe në fushën e lojës.

“Tifozët kanë ardhur çdo javë, pavarësisht nëse kemi luajtur mirë apo keq. Na kanë përkrahur shumë. Vërtet e dua shumë këtë qytet. Faleminderit atyre që na mbështesin gjithmonë”, ka theksuar Muriqi.