Klubi i futbollit Ferizaj ka dalë me reagim të hënën mbrëma pas ndeshjes së përfolur ndaj Dukagjinit. Ferizaj fitoi të dielën ndaj Dukagjinit 2:1 në minutën e 17-të të kohës shtesë të ndeshjes për ta siguruar pozitën që dërgon në barazh.
Por, mënyra sesi shënoi golin e fitores, apo më saktë sesi u pranua goli nga Altik Muhaxhiri i Dukagjinit ka ngritur dyshime të mëdha për kurdisje.
Por te Ferizaj insistojnë se janë të pastër.
“FC Ferizaj, është e gatshme të përballet në secilën instancë që ftohet. Ne nuk kemi pse të fshihemi, jemi për drejtësi, fair-play e mbi të gjitha e konsiderojmë jetike faktin që e vërteta duhet të dalë në dritë. Ne jemi të pastër, ashtu siç është djersa e mundi i lojtarëve tonë, që kanë punuar e luftuar shumë në sezonin pranverorë. Edhe një herë ftojmë organet përgjegjëse brenda Federatës së Futbollit që të merren me rastin. Pastërtia jonë nuk mund të njolloset. Sikur të ishte ndryshe, FC Ferizaj çështjen e mbijetesës do ta zgjidhte qysh moti. Sikur të ishte ndryshe, nuk do vinte puna që xhiroja e fundit të përcaktonte të ardhmen tonë. Por ne nuk dimë ndryshe. Ne besojmë fuqishëm në vlerat sportive, avokojmë për meritokraci. Kemi humbur ndeshje, kemi uruar kundërshtarët. Nuk jemi ankuar asnjëherë në referim”, shkruan në reagimin e FC Ferizja. Ferizaj insiston se ka vendosur standard të ri në Superligën e Kosovës në futboll. “Pas çdo humbje, gishtin e kemi drejtuar nga vetja. Kemi punuar shumë që të mbërrijmë këtu ku jemi. Ne jemi të gatshëm të dëshmojmë para secilit se djersa e lojtarëve tonë është investimi për të cilin krenohemi si klub e si qytet”, thuhet tutje në reagim. “Mos të harrojmë, të dielën në stadiumin ‘Zahir Pajaziti’ në Podujevë na pret një ndeshje e madhe. Shkojmë të bindur për fitore! Superliga e Kosovës do jetë e varfër çdo herë pa FC Ferizajn”.
© KOHA. Të gjitha të drejtat janë të rezervuara.
