Sulmuesi Vedat Muriqi është thesar i Mallorcas. Kosovari ka shënuar 13 gola në sezonin aktual në La Liga, shifër që nuk ka kaluar pa u vënë re nga klubet e tjera në skenën ndërkombëtare. Pavarësisht kësaj statistike, idhulli i tifozëve të Mallorcas vazhdon të insistojë në çdo intervistë dhe të pranojë se qëllimi i tij i vetëm është jo vetëm që ta respektojë kontratën që i skadon në vitin 2027, por edhe ta mbyllë karrierën si lojtar aktiv me fanellën e ekipit spanjoll. Muriqi ka folur për ngjarje të ndryshime aktuale në Mallorca, duke përfshirë edhe vazhdimësinë e tij në ishull për sezonin e ardhshëm. Te Mallorca, ai ka insistuar se po ndihet si në shtëpi.
“Unë jam në shtëpi, tifozët më duan, unë gjithashtu i dua ata dhe jam në një ishull që është një parajsë. Shpresoj që të mund të qëndroj deri në fund të karrierës sime, jo vetëm deri në fund të kontratës sime. Familja ime është shumë komode në Mallorca”, ka thënë Muriqi.
Ai këtë e shpjegoi kur u pyet për ofertat që mund të mbërrinin për të në afatin kalimtar të verës. Sulmuesi i Mallorcas, me 13 gola, është vetëm një gol larg t’i barazojë sulmuesit e mëparshëm të klubit, Albert Luque dhe Samuel Eto’on. Ai është i lumtur me krahasimin që po i bëhet.
“Është kënaqësi të krahasohesh me lojtar si Eto’o, Guiza apo sulmues të tjerë. Do të dola të kaloja shifrën e 14 golave, por është e vërtetë që nuk jam shumë i fiksuar pas kësaj”, është shprehur ai.
Muriqi e vendos ekipin gjithmonë përpara vetes dhe thotë se më shumë i gëzohet fitoreve të Mallorcas sesa golave të tij.
“Qëllimi është që skuadra ime të shënojë fitore dhe t’i fitojmë pikët, sepse nëse shënon dy gola dhe humbet tri pikë, nuk është e njëjta ndjenjë. Është më mirë të fitojmë të premten ndaj Cadizit dhe pastaj të mendojë për gola”, u shpreh Muriqi.
Reprezentuesi i Kosovës ka pranuar se ëndrra e tij është që ta fitojë Kupën e Mbretit me Mallorcan.
“Ëndrra ime nuk është të luaj në një finale të Kupës, por ta fitoj atë. Shpresoj se mund të arrihet dhe mendoj se mund të arrijmë këtë sukses. Me dy ose tre hapa të tjerë mund të kemi një ekip të rëndësishëm”, tha ai.
Së fundi ai ka folur edhe për 41 pikët e fituara nga Mallorca këtë edicion në La Liga deri më tani. Mirëpo, insiston se derisa klubi nuk do ta sigurojë mbijetesën në elitën e futbollit spanjoll, ai dhe të tjerët nuk do të jenë të qetë.
“Do të jetë stresuese derisa të mos e sigurojmë përfundimisht mbijetesën. Duhet të marrim tri pikë sa më shpejt. Duhet të fitojmë të premten dhe mendoj se ato tri pikë do të ishin të shpëtimit dhe pastaj do të mund të luajmë më të qetë në katër ndeshjet e fundit”, u shpreh Muriqi.
Mallorca të premten nga ora 21:00 e pret Cadizin, në ndeshjen e javës së 34-të të La Ligas spanjolle. Aktualisht, Mallorca renditet e 12-a në tabelë.
© KOHA. Të gjitha të drejtat janë të rezervuara.
