Pas humbjes nga Peja në xhiron e shkuar, Golden Eagle Ylli është kthyer tek fitorja në Superligën e Kosovës në basketboll. Ylli, të dielën e mposhti skuadrën e Ponte Prizrenit në ndeshjen që i takoi xhiros së 25-të. Dueli i luajtur në palestrën “13 Qershori” në Suharekë, përfundoi me rezultatin 81:68 në të mirë të Yllit, që është kampion në fuqi.
Me këtë fitore, Ylli ka tubuar 43 pikë sa i ka edhe Peja, me të cilën ndanë dy pozitat e para në tabelë. Ndërkohë, Ponte Prizreni mbetet i parafundit me 31 pikë dhe vazhdon luftën për t’i ikur plejofit kur kanë mbetur edhe tri xhiro deri në fund të pjesës së rregullt të këtij sezoni. Ylli e nisi furishëm çerekun e parë, të cilin e mbylli me 12 pikë epërsi – 22:10, por Ponte Prizreni reagoi duke u rikthyer në lojë në periudhën e dytë. Këtë çerek, Ponte e fitoi me rezultatin 23:15 dhe skuadrat shkuan në pushim me vetëm katër pikë epërsi për Yllin (37:33).
Çereku i tretë ishte paksa më i barabartë se dy të parët (22:19), ndonëse Ylli e ngriti epërsinë në shtatë pikë 59:52, me të cilën u fut në dhjetë minutat e fundit. Deri në fund të takimit, Ylli arriti ta fitojë ndeshjen falë epërsisë që pati përkundër përpjekjes së Ponte Prizrenit për të bërë diçka më shumë. Për Ponten, kjo është humbja e 18 këtë sezon, ndërsa e gjashta rresht kurse Ylli regjistroi fitoren e 18 në 25 ndeshje të luajtura deri më tani.
Më i dalluari te Ylli në këtë ndeshje ishte Chris Harris me “double-double” prej 21 pikëve e 18 kërcimeve, Gëzim Morina shtoi 15 pikë e 11 kërcime, ndërsa Bashir Ahmed pati 14 pikë të shënuara. Te Ponte Prizreni, Wayne Arnold ishte më efikasi me 16 pikë të shënuara, i përcjell nga Meriton Ismaili me 15 sosh.
