Trajneri i Bayern Munichut, Julian Nagelsmann, ka dëshirë të madhe që ekipi i tij ta eliminojë Paris Saint-Germainin nga Liga e Kampionëve. Në anën tjetër, sulmuesi Kylian Mbappe synon të shtojë edhe më shumë gola në rekordin e tij te PSG-ja dhe ta ndihmojë ekipin në avancojë në çerekfinale. Si Nagelsmann, ashtu edhe Mbappe do të kenë shansin e tyre të mërkurën mbrëma kur Bayerni do të përpiqet ta mbrojë epërsinë 1:0 në ndeshjen e dytë të 1/8 së finales.
Bayerni e fitoi ndeshjen e parë në Paris me një gol të ish-lojtarit të PSG-së, Kingsley Coman, por qasja e skuadrës në ndeshjen e kthimit do të jetë krejtësisht sulmuese, ka paralajmëruar Nagelsmann. Sipas tij, Bayerni nuk do të përpiqet ta mbrojë rezultatin e duelit të parë, pasi synon të shënojë dy apo tre gola të tjerë para tifozëve gjermanë. Mbajtja e sulmuesve në presion funksionoi në fazën e grupeve kundër Interit dhe Barcelonës, pasi asnjëra prej tyre nuk arriti të shënonte kundër Bayernit. Por mund t'i lejojë PSG-së të ketë mundësitë për t’u kthyer në lojë.
“Ne prej fillimit të ndeshjes duhet ta tregojmë praninë tonë fizike në fushë dhe të sulmojmë duke bërë presion. Po ashtu, duhet të mos lejojmë hapësirë të madhe në mbrojtjen tonë dhe do të jetë e rëndësishme të mos lejojmë shumë pasime në drejtim të Messit. Kjo është ndeshje eliminuese dhe ne nuk duhet të bazohemi vetëm në duelin e parë, por duhet të kërkojmë të shënojmë gola edhe në të dytin për ta konfirmuar kalimin në çerekfinale”, është shprehur Nagelsmann të martën.
Optimizmin për kalim tutje e ka shprehur edhe sulmuesi i Bayernit, Thomas Mueller. Ai ka thënë se Bayerni dëshmoi cilësinë në duelin e parë në Paris dhe nuk do të lejoj të befasohet në shtëpi.
“Ne e fituam ndeshjen e parë dhe automatikisht jemi në avantazh. Po ashtu luajmë në shtëpi dhe kjo është mirë për ne që të kalojmë tutje me përkrahjen e tifozëve tanë. Sigurisht se dyja ekipet do të luajmë një lojë sulmuese duke e bërë përballjen interesante dhe me presion të lartë në gjithë fushën. Krahas kësaj besoj që edhe fati do të jetë në anën tonë”, shtoi Mueller.
Te Bayerni në këtë ndeshje nuk pritet të jetë titullar sulmuesi Sadio Mane, i cili së fundmi është kthyer nga lëndimi. Ndërkohë mungojnë Manuel Neuer e Lucas Hernandez, të cilët tashmë e kanë humbur sezonin për shkak të lëndimeve.
Edhe Parisi do të ketë mungesa. Në fakt, ekipit francez do t’i mungojë njëri prej lojtarëve kryesorë. Sulmuesi Neymar tashmë e ka mbyllur edicionin. Ai do t’i nënshtrohet operimit të nyjës së këmbës dhe do të mungojë të paktën për katër muaj.
Trajneri i Parisit, Christoph Galtier, ka pranuar se mungesa e Neymarit do të ndihet shumë në ekipin e tij, i cili kërkon ta eliminojë Bayernin. Synimi i madh i PSG-së është triumfi në Champions këtë edicion.
“Lëndimi i Neymarit na ka goditur shumë pasi ai është njëri prej lojtarëve më të rëndësishëm në ekipin tonë. Mirëpo, ne tashmë duhet të mos mendojmë shumë për Neymarin, por të fokusohemi te ndeshja që ndoshta është më e rëndësishmja këtë edicion. Triumfi në Champions është synimi i klubit dhe për këtë arsye do të bëjmë të pamundurën për ta kthyer rezultatin në favor tonin për të vazhduar rrugëtimin në këtë garë”, ka thënë Galtier.
Në mungesë të Neymarit, te Parisi sytë i kanë kthyer kah Lionel Messi e posaçërisht Mbappe. Francezi 24-vjeçar, Mbappe, vikendin e shkuar u bë golashënuesi më i mirë në histori të klubit, kur shënoi gol në fitoren 4:2 ndaj Nantesit. Tani Mbappe ka 201 gola në 247 paraqitje për Parisin në të gjitha garat. Mesfushori italian, Marco Verratti pret shumë nga Mbappe në duelin ndaj Bayernit.
“Sigurisht, Mbappe është një lojtar i madh me karakter dhe personalitet të fortë. Ai po kalon nëpër një formë të jashtëzakonshme këtë sezon dhe besoj se do të na ndihmojë shumë në këtë ndeshje të rëndësishme ndaj Bayernit. Krahas Mbappes e kemi edhe Leon, të cilët formojnë një dyshe të frikshme në sulmin tonë”, është shprehur Verratti.
Të mërkurën prej orës 21:00 zhvillohet edhe një ndeshje tjetër në kuadër të 1/8 së finales. Skuadra e Tottenhamit pret Milanin, i cili e fitoi duelin e parë 1:0. Tottenhami do ta ketë një përforcim shtesë për këtë ndeshje, pasi trajneri Antonio Conte do të kthehet në bankinë pas mungesës prej tri javësh. Ai ishte në krye të ekipit në disfatën në stadiumin “San Siro” por mungoi në ndeshjet tjera për shkak se mbeti në vendlindje për t’u rikuperuar nga një operim.
Të martën, Conte ka thënë se po ndihet mirë dhe është i gatshëm që energjinë e tij ta transferojë te lojtarët e Tottenhamit në fushë për ta parakaluar Milanin.
E mërkurë (21:00)
Bayern M. – PSG (1:0)
Tottenham – Milan (0:1)
*Në kllapa janë rezultatet e ndeshjeve të para
© KOHA. Të gjitha të drejtat janë të rezervuara.
