Borussia Dortmundi ka shënuar fitore të madhe ndaj kandidatit tjetër për titull kampioni në Gjermani, Leipzigut.
“Verdhezinjtë” të premten mbrëma fituan në “Signal Iduna Park” kundër Leipzigut me rezultatin 2:1, për fitoren e 10-të rresht në të gjitha garat.
Ishte ndeshje e xhiros së 23-të e Bundesligës gjermane.
Kapiteni Marco Reus shënoi nga penalltia në minutën e 21-të të ndeshjes. Për të ishte goli i 159-të me fanellën e Dortmundit, dhe barazohet me legjendën Michael Zorc, në vendin e dytë si golashënuesi më i mirë në histori të skuadrës.
Emre Can shënoi për 2:0 në minutën e 39-të.
Golin e vetëm për mysafirët e realizoi Emil Forsberg në minutën e 74-t.
Dortmundi del në vendin e parë përkohësisht me 49 pikë, tri më shumë se Bayern Munichu i vendit të dytë.
Leipzigu mbetet në pozitën e katërt me 42 pikë.
