Trajneri Graham Potter thotë se disa lojtarë do të mbesin tejet të “zhgënjyer” kur Chelsea të dorëzojë listën e ekipit për Ligën e Kampionëve, pas shpenzimeve të klubit prej 289 milionë funteve në janar.
Chelsea nënshkroi me tetë lojtarë gjatë afatit kalimtar të dimrit, por sipas rregullave të UEFA-s vetëm tre prej tyre mund të shtohen në listën e londinezëve për ndeshjet evropiane.
Klubet duhet të informojnë UEFA-n për ndryshimet e skuadrës deri në mesnatën e së enjtes. Megjithatë, trajneri i Chelseat, Potter tha se është “i emocionuar” për sfidën që do të ketë në përzgjedhjen e lojtarëve.
“Do të ketë disa biseda të sikletshme. Ky është realiteti se ku jemi”, tha ai. “Vetëm 11 mund të luajnë dhe vetëm një pjesë e caktuar mund të jetë në ekip, kështu që gjithmonë do të ketë të tjerë që do të zhgënjehen”.
Chelsea shpenzoi 289 milionë funte gjatë afatit kalimtar të janarit. Klubi e ka e çuar totalin e shpenzimeve që kur biznesmeni amerikan Todd Boehly mori pronësinë në muajin maj, në më shumë se 550 milionë funte për 17 lojtarë të rinj.
“Sfida është fjala e duhur. Sigurisht që nuk ankoheni për të - është emocionuese”, tha Potter. “Është një provë për mua dhe stafin, por edhe një test emocionues. Kemi shumë lojtarë vërtet të mirë. Ne duhet të krijojmë një mjedis ku ka konkurrencë, konkurrencë të shëndetshme ku ata mund të shtyjnë njëri-tjetrin. Por në të njëjtën kohë të kuptojmë se do të ketë zhgënjim nganjëherë dhe se vetëm 11 mund të luajnë”.
Potter tha se ishte “shumë i kënaqur” me transferimin e mesfushorit të Argjentinës, Enzo Fernandez nga Benfica. Chelsea pagoi një tarifë rekorde në Britani prej 121 milionë eurosh për 22-vjeçarin argjentinas, fitues të Kupës së Botës. Ky transferim u realizua në ditën e fundit të afatit kalimtar.
“Mësova se ne kishim nënshkruar me Enzon kur gjithçka përfundoi dhe jam shumë i kënaqur sepse ai është një lojtar fantastik”, tha Potter. “Spanjishtja ime nuk është e shkëlqyeshme, anglishtja e tij nuk është e shkëlqyeshme, kështu që na duhej të mbështetemi te përkthyesi”.
Trajneri i Chelseat shtoi se nuk është i sigurt nëse Fernandez do të pajiset me lejen e punës, në mënyrë që të jetë në gjendje të debutojë me Chelsean të premten kundër Fulhamit.
Chelsea është në vendin e 10-të në Premier League, 10 pikë larg katër vendeve që dërgojnë sezonin tjetër në Ligën e Kampionëve.
© KOHA. Të gjitha të drejtat janë të rezervuara.
