Tetë golat në 12 ndeshje të La Ligas para pushimit të detyrueshëm shkaku i Kampionatit Botëror “Katari 2022” befasuan të gjithë. Ai ishte lojtari kryesor te Mallorca, si për gola ashtu edhe për pasime dhe angazhim në fushë. Kjo e bëri sulmuesin Vedat Muriqi njërin prej lojtarëve më të mirë të kampionatit spanjoll, por gjithçka u stopua pastaj.
Nëse dikush është dëmtuar nga pushimi për shkak të Botërorit, atëherë përfundimisht është Muriqi, ka shkruar e përditshmja spanjolle “AS” të hënën.
Muriqi shënoi gola në katër ndeshjet e fundit para Botërorit të Katarit, por pas vazhdimit të kampionatit spanjoll sulmuesi i Kosovës nuk po e gjen rrugën drejt golit. Në pesë ndeshjet e këtij viti në La Liga, Muriqi jo vetëm që nuk ka shënuar gol, por nuk e ka pasur asnjë rast. Dhe rënia e formës së tij po e shqetëson Mallorcan. Në këto pesë ndeshje Mallorca ka regjistruar tri humbje e dy fitoreve. Në total ka realizuar vetëm dy gola. Shkaku i mosefikasitetit, trajneri i Mallorcas, Javier Aguirre, po mendon që ndoshta duhet ta ndërrojë sistemin e lojës, në mënyrë që Muriqi të rikthehet te shënimi i golave. Ndeshjen e radhës Mallorca e luan të dielën në shtëpi kundër Real Madridit dhe sërish shpresat do të jenë te reprezentuesi i Kosovës.
“E shoh Muriqin si gjithmonë, të përfshirë dhe të angazhuar në stërvitje. Është i lumtur edhe në zhveshtore dhe ka raporte të mira edhe me tifozët. Nuk e di, ndoshta duhet të provojmë ndonjë taktikë tjetër për të parë reagimin e tij. Do të shohim”, ka paralajmëruar Aguirre.
Zakonisht Mallorca luan me vetëm një sulmues, i cili është Muriqi. Ai pret ndihmën nga krahët dhe prania e Muriqit në zonën e kundërshtarit është shumë e rëndësishme për Mallorcën. Megjithatë, mungesa e kreativitetit ka bërë që Muriqi në pesë ndeshjet e fundit të jetë në situatë ku nuk e ka pasur asnjë rast shënimi.
“Deri para Botërorit Muriqi ishte në formë të jashtëzakonshme por pas rifillimit të kampionatit ai jo vetëm që nuk ka shënuar gol, por nuk ka pasur rast. Golat e tij janë ndalur vitin e shkuar dhe te Mallorca po presin që të rikthehet në formë në ndeshjen e radhës”, ka shkruar “AS”.
Pas huazimit për gjashtë muaj edicionin e shkuar, Muriqi u rikthye te Mallorca që vendosi ta blinte kartonin e tij nga skuadra e Lazios. 28-vjeçari ka kontratë me ekipin spanjoll deri në vitin 2027. Mallorca u rezistoi ofertave nga Premier League për Muriqin.
Aktualisht Mallorca renditet e dhjeta në La Liga me 25 pikë të mbledhura pas 19 ndeshjeve të zhvilluara.
© KOHA. Të gjitha të drejtat janë të rezervuara.
