Sulmuesi Karim Benzema e ka përfunduar karrierën e tij ndërkombëtare. Fituesi i “Topit të Artë”, të hënën nëpërmjet një postimi në “Twitter” ka njoftuar për tërheqjen e tij nga Franca.
Ai nuk luajti në Kupën e Botës “Katari 2022” për shkak të lëndimit, ndonëse ishte ftuar nga përzgjedhësi Didier Deschamps.
Në fakt, ai u stërvit me Francën por u detyrua të largohet nga Katari për t’u rikuperuar nga lëndimi i muskulit të këmbës.
“Bëra përpjekjet dhe gabimet e nevojshme për të qenë këtu ku jam sot dhe jam krenar për këtë! Shkrova historinë time dhe historisë tonë i erdhi fundi”, shkroi sulmuesi i Real Madridit, i cili postoi një fotografi me fanellat e Francës.
Benzema debutoi me Francën në vitin 2007 dhe në total shënoi 37 gola në 97 paraqitje.
Për disa vite, Benzema u la jashtë ekipit të Francës (2016 – 2021) pas një skandali, përpara se të rikthehet vitin e shkuar.
Ai me Francën e ka fituar edicionin 2020/21 të Ligës së Kombeve.
© KOHA. Të gjitha të drejtat janë të rezervuara.
