Mbrojtësi polak, Matty Cash ka paralajmëruar Anglinë se francezi Kylian Mbappe është një nivel tjetër.
Cash është impresionuar me shpejtësinë e francezit Mbappe. Franca kaloi në çerekfinale të Botërorit, pasi mposhti të dielën Poloninë me rezultatin 3:1.
“Padyshim e pabesueshme, ndoshta kundërshtari im më i vështirë. Unë do të kisha thënë më parë se Raheem Sterling ishte kundërshtari im më i vështirë. Kur u përballëm me Manchester Cityn ai ishte i shkëlqyer. Sterling është i shpejtë, por unë mendoj se Mbappe është elektrik. Ai është më i shpejtë. Ai është një nivel tjetër”, ka thënë Cash të hënën në konferencë për media. “Kur ai merr topin, ndalon dhe lëviz, ai është gjëja më e shpejtë që kam parë ndonjëherë”. Por, mbrojtësi polak mendon se Kyle Walker mund ta ndalë Mbappen. “Kyle Walker është po aq i shpejtë sa Mbappe. Ai është mbrojtësi i djathtë më i mirë i Anglisë dhe ka më shumë përvojë se unë”, është shprehur Cash. Anglia dhe Franca do të takohen të dielën në çerekfinalen e Botërorit.
© KOHA. Të gjitha të drejtat janë të rezervuara.
